ފުލުހުންނާއި ސިފައިންގެ ފްލެޓްތަކުގެ ކުލި ދެއްކުން އެއް އަހަރަށް ފަސްކޮށްފި
ސިފައިންނާއި ފުލުހުންގެ ފްލެޓުތަކުގެ ކުލި އެއް އަހަރު ދުވަހަށް ފަސް ކުރަށް ސަރުކާރުން ނިންމަވައިފިއެވެ.
ސަރުކާރުގެ ހަފްތާ-14 ޕްލޭންގެ ތެރެއިން ފުރަތަމަ 4 ހަފްތާގެ ތެރޭގައި ހާސިލު ކުރަން ބޭނުންވާ ކަންކަމުގެ ތަފްސީލު ހާމަކުރަން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި، އެއޮފީހުގެ ޕަބްލިކް ޕޮލިސީގެ އަންޑަރ ސެކްރެޓަރީ މުހައްމަދު ފިރުޒުލް ސަރުކާރުން މިކަން ކުރުމަށް ނިންމަވާފައިވާކަން ހާމަކޮށްފައެވެ.
މިގޮތުން ސިފައިންނާއި ފުލުހުން ފްލެޓުތަކުގެ ކުލި ފަސް ކުރަނީ އިންޓްރެސް ނުހިނގާ ގޮތަށެވެ.
"މި ދެމަޝްރޫޢުއަށް ދޫކޮށްފައިވާ ޓްރެޝަރީ ލޯން އަނބުރާ ދެއްކުން އެއް އަހަރުގެ ގްރޭސް ޕީރިއޭޑަކަށް ނުހިނގާ ގޮތަށް، ފަސްކޮށް ރީސްޓްރަކްޗަރ ކުރުމަށް ރައިސުލްޖުމުހޫރިއްޔާ ވަނީ ނިންމަވާ އެކަން މާލީ ވުޒާރާއަށް އަންގަވާފައި. އެހެން ކަމުން މިވައުދުވެސް މިވަނީ ހާސިލް ކުރެވިފައި " ފިރުޒުލް ވިދާޅުވިއެވެ.
ސިފައިންނާއި ފުލުހުންނަށް ބޯހިޔަވަހިކަން ފޯރުކޮށްދިނުމުގެ މަޤްޞަދުގައި މި ދެ މަޝްރޫޢު ފެށިގެން ކުރިއަށްދާތާ އަހަރުތަކެއް މިވަނީ ވެފައެވެ.
ސިފައިންނާއި ފުލުހުންނަށް ހުޅުމާލޭ ގައި ފްލެޓްތަކެއް އިމާރާތް ކުރަން ފެށީ 2013 ވަނަ އަހަރު، ރައީސް ޑރ. މުހައްމަދު ވަހީދުގެ ވެރިކަމުގައެވެ.
