ޔޫތު މިނިސްޓްރީން ޖަމިއްޔާތަކާއެކު އޮންލައިން މަޝްވަރާ ބައްދަލުވުމެއް ބާއްވަނީ
ކޮވިޑް-19ގެ ސަބަބުން މަދަނީ ޖަމިއްޔާތަކަށް ދިމާވެފައިވާ ދަތިތަކާއި އަދި އެ ޖަމިއްޔާތަކުން ހިންގުމަށް ރާވާފައިވާ ޕްރޮގްރާމްތަކާ ގުޅޭ ގޮތުން މަޝްވަރާކުރުމަށް މިނިސްޓްރީ އޮފް ޔޫތު، ސްޕޯރޓްސް އެންޑް ކޮމިއުނިޓީ އެމްޕަވަރމަންޓުން އޮންލައިން ބައްދަލު ވުމެއް ބޭއްވުމަށް ނިންމައިފިއެވެ.
އަންނަ އަންގާރަ ދުވަހު ހެނދުނު 11:00 ގައި ބޭއްވުމަށް ހަމަޖެހިފައިވާ މި ބައްދަލުވުން ކުރިއަށް ދާނީ ޒޫމް މެދުވެރިކޮށް އޮންލައިން ކޮށެވެ.
ދެންއާއި ވާހަކަ ދައްކަވަމުން ޖަމިއްޔާތަކުގެ ރަޖިސްޓްރާ އަދި މިނިސްޓްރީ އޮފް ޔޫތުގެ ސީނިއަރ ޕޮލިސީ ޑައިރެކްޓަރ އަހްމަދު އިރާޝް ވިދާޅުވީ މިބައްދަލުވުމަކީ ކޮވިޑް-19ގެ ސަބަބުން ޖަމިއްޔާތަކަށް ދިމާވެފައިވާ ދަތިތަކާއި އަދި އެ ޖަމިއްޔާތަކުން ކުރިއަށް ގެންދިއުމަށް ރާވައިފައިވާ ޕްރޮގްރާމްތަކާ ބެހޭގޮތުން މަޝްވަރާ ކުރުމަށް ބާއްވާ ވަރަށް ހާއްސަ ބައްދަލު ވުމެއް ކަމަށެވެ.
“މި ބައްދަލުވުމުގައި އަޅުގަނޑުމެން އަލިއަޅުވާލާނެ ކަންތައްތަކުގެ ތެރޭގައި މިހުންނަނީ މިހާރު މިނިސްޓްރީން ޖަމިއްޔާތަކާ ގުޅިގެން ކުރަން ރާވާފައި ހުރިކަންތައްތަކާ އަދި އޭގެ އިތުރުން މި ވޭތުވެދިޔަ ތަނުގައި އަޅުގަނޑުމެން ކުރަމުން ގެންދިޔަ ފަށާފައިވާ ބައެއް ކަންތައްތަކާ މި ކަން ކަމުގެ އަޕްޑޭޓްތައް ދިނުން.” ދެން އާއި ވާހަކަ ދައްކަވަމުން އިރާޝް އިތުރަށް ވިދާޅުވިއެވެ.
ހަމައެހެންމެ މިވަގުތު ޖަމިއްޔާތަކަށް ކޮވިޑްގެ ހާލަތުގެ ސަބަބުން ދިމާވެފައިވާ ދަތިތަކުން އަރައިގަތުމަށްޓަކައި ކުރެވިދާނެ އެކިއެކި ކަންކަމާ ގުޅޭ ގޮތުން ވެސް މިނިސްޓްރީގެ ކަމާ ބެހޭ ފަރާތްތަކާ އެކު މި ބައްްދަލުވުމުގައި މަޝްވަރާ ކުރެވިގެންދާނެ ކަމަށް އިރާޝް މައުލޫމާތު ދެއްވިއެވެ.
މި ބައްދަލު ވުމުގައި ބައިވެރިވުމަށް ރަޖިސްޓްރީ ކުރުމަށް އޮންލައިން ފޯމެއް މިހާރު ވަނީ މިނިސްޓްރީ އޮފް ޔޫތު، ސްޕޯރޓްސް އެންޑް ކޮމިއުނިޓީ އެމްޕަވަރމަންޓްގެ ފޭސްބުކް ޕޭޖު އަދި ޓްވިޓަރ އެކައުންޓުގައި ހިއްސާ ކުރެވިފައެވެ. މި ބައްދަލުވުމުގައި ދިވެހިރާއްޖޭގައި ރަޖިސްޓްރީ ކުރެވިގެން ހިންގާ ހުރިހާ ޖަމިއްޔާއަކަށްވެސް ބައިވެރި ވެވޭނެއެވެ.
މި ބައްދަލު ވުމުގައި ވީހާ ވެސް ގިނަ ޖަމިއްޔާތަކުން ބައިވެރި ވުމަކީ މިނިސްޓްރީގެ ވަރަށް ބޮޑު އެދުމެއް ކަމުގައި އިރާޝް ފާހަގަ ކުރެއްވިއެވެ. އަދި ހަމަ އެހެންމެ މި ބައްދަލުވުން މިނިސްޓްރީގެ ފޭސްބުކް ޕޭޖު މެދުވެރިކޮށް ލައިވް ކުރުމަށް ވެސް މަސައްކަތް ކުރަމުންދާ ކަމުގައި އިރާޝް ވިދާޅުވިއެވެ.
Ads by STO
