ވަޒީރުންނަށް ރުހުން ނުދިނީ ބޭރުގެ ބަޔަކުގެ އަމުރަށް، މަޖުބޫރުވެގެން: ރައީސް
އިދިކޮޅު އެމްޑީޕީގެ މެޖޯރިޓީ އޮންނަ ރައްޔިތުންގެ މަޖިލީހުން އެމަނިކުފާނުގެ ކެބިނެޓުގައި ހިމެނިވަޑައިގަންނަވާ ތިން ވަޒީރަކަށް ރުހުން ނުދިނީ ބޭރުގެ ބަޔަކު މަޖުބުރޫކޮށްގެން ކަމަށް ރައީސް ޑރ މުހައްމަދު މުއިއްޒު މިރޭ ވިދާޅުވެއްޖެއެވެ.
ބޮޑުތިލަދުންމައްޗަށް ކުރައްވަމުން ގެންދަވާ ދަތުރުފުޅުގެ ތެރެއިން ހދ. ނޮޅިވަރަންފަރުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ރިޔާސީ ނިޒާމަކުން ވެރިކަމަށް ރައްޔިތުން އިންތިހާބުކުރާ މީހާ، އެކުލަވައިލާ ކެބިނެޓުގެ ބޭފުޅުންގެ ޝަރުތުތައް ހަމަވާނަމަ ވަޒީރުންނަށް ރުހުން ދޭން ޖެހޭ ކަމަށެވެ.
''އެއްވެސް އަސާސެއް ނެތި ނޫންތޯ އަޅުގަނޑުމެންގެ ބައެއް ވަޒީރުންނަށް ރުހުން ނުދިނީ'' އެމަނިކުފާނު ވިދާޅުވިއެވެ. އެއަށް ފަހު ރައީސް ތުހުމަތު ކުރެއްވި ގޮތުގައި ބައެއް ވަޒީރުންނަށް ރުހުން ނުދޭން ބޭރުގެ ބަޔަކު އިދިކޮޅު މެމްބަރުންތަކަށް މަޖުބޫރު ކުރުވީއެވެ. އެއީ ސީދާ ކޮން ގައުމެއްގެ ބައެއް ކަމަށް ރައީސް ވިދާޅެއް ނުވެއެވެ.
''އެބޭފުޅުންގެ މައްޗަށް ބާރު ހިންގާ ރާއްޖެއިން ބޭރުގެ ކޮންމެސް ބަޔަކު ކަމަށް، ބޮޑަށް ގަބޫލުކުރެވޭ ފަރާތަކުން އަމުރުކުރާ ގޮތަކަށް މަޖުބޫރުން. ތިމަންނަމެން ކޮންމެހެންވެސް ޖެހެއޭ ދެތިން މީހުން ދުއްވާލަން. ހަމަ އެ ލެންގުއޭޖް ބޭނުންކުރެއްވީ'' ރައީސް ވިދާޅުވިއެވެ.
މި ސަރުކާރުގެ 22 ވަޒީރުންނަށް ރުހުންދޭން މިދިޔަ މަހު 29 ގައި ބޭއްވި ޖަލްސާގައި ތިން ވަޒީރަކަށް ރުހުން ނުލިބެއެވެ އެއީ، ހައުސިން މިނިސްޓަރު ޑރ. އަލީ ހައިދަރު އާއި އިސްލާމިކް މިނިސްޓަރު ޑރ. ޝަހީމް އަލީ ސައީދުގެ އިތުރުން ބަންޑާރަނައިބު އަހުމަދު އުޝާމެވެ.
ނަމަވެސް ރުހުން ނުލިބުނު ވަޒީރުން ހަމަ އެ މަގާމުތަކަށް, ރައީސް ވަނީ އަލުން އައްޔަންކުރައްވާފައެވެ.
