މަކުނުދޫ ވައިގެ ބަނދަރުގެ ފަސޭހަކަން މިއަހަރު ލިބިގެން ދާނެ: ރައީސް
އެކަހެރިކޮށް އޮންނަ ހދ. މަކުނުދޫގައި އަޅަމުން އަންނަ ވައިގެ ބަނދަރުގެ މަސައްކަތް ނިމި, އެ ކަމުގެ ފަސޭހަ މި އަހަރު ލިބިގެން ދާނެ ކަަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ އާންމުން ފަރާތްތަކުން ރައީސާ ސުވާލުކުރުމަށް ކުރިއަށް ގެންދާ "ރައީސްގެ ޖަވާބު" ޕްރޮގްރާމްގައި ހދ.މަކުނުދޫ، ލިބަޓީ، އިފާސާ އަޙްމަދު ކުރި ސުވާލަކަށް ޖަވާބު ދެއްވަމުންނެވެ.
އިފާސާ ވަނީ މަކުނުދޫއަކީ އެކަހެރިކޮށް ކޮށް އޮންނަ ރަށެއް ކަމާއެކު, ރަށު ރައްޔިތުން ދަތުރުފަތުރުކުރުމަށް ނުހަނު ގިނަ ދަތިތަކާ ކުރިމަތިލާން ޖެހިފައިވާ ކަން ފާހަގަކޮށްފައެވެ. އޭނާ ސުވާލުކުރީ އެ މިހާރު ފަށާފައިވާ އެއާޕޯޓުގެ މަސައްކަތް ފެށޭނެ ދުވަހަކާ ގުޅޭ ގޮތުންނެވެ.
އެ ސުވާލަށް ޖަވާބު ދެއްވަމުން ރައީސް ވިދާޅުވީ މަކުނުދޫ އެއާޕޯޓުގެ މަސައްކަތަކީ ވަރަށް އިސްކަންދޭ މަސައްކަތެއް ކަމަށާއި ރައްޔިތުން އެދޭ ގޮތަށް ބާރު ސްޕީޑުގައި އެ މަސައްކަތް ކުރިއަށް ގެންގޮސްދެއްވާނެ ކަމަށެވެ.
"ވަރަށް ބާރަށް ކުރިއަށް އެބަ ގެންދަން. އިރާދަކުރެއްވިއްޔާ މި އަހަރު ނިމެން ވާއިރަށް މި ބަލަނީ އެއާޕޯޓު ހުޅުވޭތޯ. އެހެންވީމާ މި އަހަރު އިރާދަކުރެއްވިއްޔާ އޭގެ ފަސޭހަކަން ލިބެން ފަށާނެ," ރައީސް ވިދާޅުވިއެވެ.
މިއަދު މަކުނުދުއަށް ވަޑައިގެން ރައީސް ވަނީ 1500 މީޓަރަށް ހަދަން އޮތް ރަންވޭ 1800 މީޓަރަކަށް ބޮޑު ކޮށްދެއްވާނެ ކަމަށް ވެސް ވިދާޅުވެފަ އެވެ.
އެމަނިކުފާނު ވިދާޅުވީ އެއާއެކު އެއާޕޯޓާ ރަށަށް އިތުރު ކުރިއެރުން ލިބިގެންދާނެ ކަމަށެވެ.
