އިންތިހާބު ލަސްވިޔަސް ވާދަކުރަން ދެން ފުރުސަތެއް ނެތް
ވިހަ ވަނަ ރައްޔިތުންގެ މަޖިލީހަށް މެމްބަރުން ހޮވަން ބާއްވާ އިންތިހާބުގެ ތާރިހު ލަސްވިޔަސް ވާދަކުރުމަށް އިތުރު ފުރުސަތެއް ނެތް ކަމަށް އިލެކްޝަން ކޮމިޝަން (އީސީ) އިން މިއަދު ބުނެފިއެވެ.
ރޯދަ މަހު އިންތިހާބު ނުބާއްވާ ގޮތަށް އިދިކޮޅު އެމްޑީޕީގެ މެޖޯރިޓީ އޮންނަ ރައްޔިތުންގެ މަޖިލީހުން ފާސްކުރި ބިލު ރައީސް ޑރ މުހައްމަދު މުއިއްޒު ތަސްދީގު ކުރެއްވުމާއެކު މާޗު މަހުގެ 17 ވަނަ ދުވަހު ބާއްވާ ކުރިން ކަނޑައަޅާފައިވާ އިންތިހާބު މިހާރު ވަނީ ފަސްކުރެވިފައެވެ. އިންތިހާބު ދެން އޮންނާނީ އޭޕްރީލް މަހުގެ 21 ވަނަ ދުވަހުއެވެ. އެ ނިންމުން މިހާރު ސަރުކާރުގެ ގެޒެޓުގައި ޝާއިއުވެސް ކޮށްފައިވެއެވެ. ވޯޓުލުން ކުރިއަށްދާނީ އެ ދުވަހުގެ އަށަކުން ހަތަރަކަށެވެ.
އަލަށް ކަނޑައެޅި ތާރީހާއެކު މިހާރު ވާދަކުރަން ފޯމް ހުށަހަޅާފައިވާ ކެންޑިޑޭޓުންގެ އިތުރުން އެހެން ކެންޑިޑޭޓުންނަށް އިންތިހާބުގައު ވާދަކުރެވޭނެތޯ ސުވާލު ކުރުމުން އީސީގެ ރައީސް ފުއާދު ތައުފީގު ވިދާޅުވީ އެ އެ ފުރުސަތު އަލުން ހުޅުވައިނުލާނެ ކަމަށެވެ. އެއީ ގާނޫނުގައިވާ ގޮތުންމަަ އިންތިހާބަށް ކުރިމަތިލާން ހުޅުވާލަން ޖެހޭ 14 ދުވަހުގެ މުއްދަތު ހަމަވެފައިވާތީއެވެ.
އީސީން ބުނެފައިވާ ގޮތުން ތާރީހަށް އައި ބަދަލާއެކު އަލަށް ވޯޓުލުމުގެ ހައްގު 560 މީހަކަށް ލިބޭނެއެވެ. މި ފަހަރުގެ އިންތިހާބުގައި 368 ކެނޑިޑޭޓުން ވާދަކުރެއެވެ. އޭގެ ތެރޭގައި 41 އަންހެން ކެނޑިޑޭޓުން ހިމެނެއެވެ.
އިންތިހާބުގައި ހަރަކާތްތެރިވާ އޮފިޝަލުން ތަމްރީނު ކުރުމުގެ މަސައްކަތް އީސީން ވަނީ ފަށާފައެވެ. މިހާތަނަށް 381 އޮފިޝަލުން ތަމްރީން ފުރިހަމަކޮށްފައިވާ ކަމަށް އެ ކޮމިޝަނުން މައުލޫމާތުދެއެވެ.
މިރޭ ކަނޑައެޅި ތާރީހާ އެކު އަލުން ރީ ރަޖިސްޓްރޭޝަނަށް ހުޅުވާލާނެއެވެ. އިންތިހާބުގެ ކެމްޕޭނު ރަސްމީކޮށް ފަށާފައިވަނީ އިދިކޮޅު އެމްޑީޕީން އެކަންޏެވެ. މި ފަހުން އެ ޕާޓީގެ މަޖިލީސް ކެމްޕޭނު ލޯންޗުކޮށްފައިވެއެވެ.
