ކުޑަކުދިން އެސްކްޕްލޮއިޓްކުރުމުގެ މައްސަލަތައް ބަލައި ދައުވާކުރާނެ ގޮތުގެ އިރުޝާދެއް އެކުލަވާލައިފި
ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގެ ދަށުން ކުޑަކުދިން އެކްސްޕްލޮއިޓުކުރުމުގެ މައްސަލަތައް ތަހުގީގުކުރުމާއި ދައުވާކުރުމުގައި އަމަލު ކުރާނެ ގޮތްތަކުގެ އިރުޝާދެއް ޕްރޮސެކިއުޓާ ޖެނެރަލްގެ އޮފީހުން އެކުލަވާލައިފިއެވެ.
ޕީޖީ އޮފީހުން މިއަދު ބުނީ, މިފަދަ އިރުޝާދެއްގެ ބޭނުމަކީ އެކުށްތައް ތަހުގީގުކުރުމާއި ދައުވާކުރުމުގައި ގޮންޖެހުންތަކެއް ހުރި ބާވަތެއްގެ ކުށަކަށްވާތީ, މިކަމުގައި ޖިނާއީ އަދުލުގެ ނިޒާމުގައި ހަރަކާތްތެރިވާ ހުރިހާ އިދާރާތަކުން އެއްގޮތަކަށް ޢަމަލުކުރާކަން ކަށަވަރުކުރުމެވެ.
އެ އޮފީހުން ބުނީ މި އިރުޝާދަކީ، ޕްރޮސިކިއުޓަރ ޖެނެރަލްގެ ގާނޫނު ގައި ބަޔާންކޮށްފައިވާ ޕްރޮސިކިއުޓަރ ޖެނެރަލްގެ މަސްއޫލިއްޔަތުތަކާއި ބާރުތަކުގައި ޖިނާއީ ކުށެއް ކަމަށް ތުހުމަތުކުރެވޭ އަމަލުތަކާ ގުޅިގެން ބަލާ ބެލުންތަކާއި ހިންގާ ތަހުގީގުތައް ބަލައި އެކަންކަން ހިނގަނީ ގާނޫނާ އެއްގޮތަށްތޯ ބެލުމަށް އޮތް މަސްއޫލިއްޔަތުގެ ދަށުން ނެރެފައިވާ އިރުޝާދެއް ކަމަށެވެ.
މި އިރުޝާދުގެ ސަބަބުން، ކުޑަކުދިންނާ ދެކޮޅަށް ކުރެވޭ އަދި ކުޑަކުދިން ގްރޫމްކޮށްގެންނާއި ރެކްރޫޓުކޮށްގެން އެކުދިން ލައްވާ ކުށްކުރުވާ މީހުންގެ މައްސަލަތައް، ރާއްޖޭގެ ހުރިހާ ދިމާއެއްގައި މިހާރަށްވުރެ ހަރުދަނާ ގޮތެއްގައި ބަލައި ފިޔަވަޅު އެޅުމަށް މަގުފަހިވެގެންދާނެ ކަމަށް އެ އޮފީހުން ބުނެފައިވެއެވެ.
މި އިރުޝާދާއެކު މިބާވަތުގެ މައްސަލަތަކުގައި ފުލުހުން ތަހުީގުގައި ބަލާނެކަންކަމާއި ދައުވާކުރުމުގައި ގެންގުޅޭ އުސޫލުތައް، މި ދާއިރާގައި މަސައްކަތްކުރާ ހުރިހާ އިދާރާތަކަށް ސާފުވެފައި އޮންނާނެ ކަމަށް ވެސް ބުނެފައިވެއެވެ.
ކުޑަކުދިން އެކްސްޕްލޮއިޓްކުރުމުގެ ކުށުގެ ތެރޭގައި ހިމެނޭ ކަމަށް ގާނޫނުގައި ބަޔާންކޮށްފައިވަނީ ތަފާތު އެކިއެކި ކުށް ކުރުމަށްޓަކައި ކުޑަކުދިން ރެކްރޫޓްކޮށް، ނުވަތަ އެނޫން ގޮތަކަށްވެސް ބޭނުންކުރުމެވެ.
އެކިއެކި އޮންލައިން ގޭމްތަކާއި އެފަދަ އެޕްލިކޭޝަންތައް މެދުވެރިކޮށް ކުޑަކުދިން ރެކްރޫޓުކޮށް, ގްރޫމްކޮށް އެފަދަ މައްސަލަތައް އިތުރުވާ ކަން ފުލުހުން މި ހަފްތާގައި ބޭއްވި ނޫސްވެރިންގެ ބައްދަލުވުމެއްގައި ވަނީ ފާހަގަކޮށްފައެވެ. އެފަދަ ބައެއް މައްސަލަތަކުގައި ދައުވާކުރަން ޕީޖީ އޮފީހަށް ވެސް ވަނީ ފޮނުވައިފައެވެ.
