ޑްރަގުގެ ފަރުވާ މިހާރަށްވުރެ ހަރުދަނާކުރާނަން: ރައީސް
މަސްތުވާތަކެއްޗަށް ދެވި ހިފާފައިވާ މީހުންނަށް ދެވޭ ފަރުވާ މެދުކެނޑުމެއް ނެތި ކުރިއަށް ގެންދެވޭނެ އިންތިޒާމު ހަމަޖައްސައްވާނެ ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެއެވެ.
ޑްރަގު ބޭނުންކުރާ މީހުނަށް ފަރުވާގެ ގޮތުގައި ދެވޭ މެތަޑޯން ފަރުވާގެ ޕްރޮގްރާމްގައި ބައިވެރިވަމުން ދަނިކޮށް ކުރީގެ މައްސަލަ އެއް ގައި ރިހެބަށް ދާން ޖެހުމުން އަދާކުރަމުންދާ ވަޒީފާ ދޫކޮށްލަން ޖެހޭ ކަމަށް ބުނެ އާންމުންގެ މީހަކު ވަނީ ''ރައީސްގެ ޖަވާބު'' ގެ މިއަދުގެ ސެގްމެންޓުގައި ކަންބޮޑުވުން ފާޅުކޮށްފައެވެ.
އަދި ރިހެބަށް ދާން ހުކުމްކުރުމުން ފަރުވާ މެދުކެނޑޭ ކަމަށް ބުނެ އޭނާ ރައީސް އަރިހު އެދުނީ ގާނޫނުގެ ތެރެއިން އެކަމަށް ހައްލެއް ހޯދައި ދިނުމަށެވެ.
ޖަވާބުގައި ރައީސް ވިދާޅުވީ މެދުކެނޑުމެއް ނެތި ފަރުވާ ފުރިހަމަކުރެވޭނެ ގޮތަކީ ކުރެވިދާނެ ކަމެއް ކަމަށެވެ. އެހެންވެ ގާނޫނުގެ ތެރެއިން އެ މައްސަލައަށް ހައްލެއް ހޯދައި ދެއްވާނެކަމުގެ ޔަގީންކަން ރައީސް ދެއްވިއެވެ.
ހޯމްލޭންޑް މިނިސްޓްރީއާ ވާހަކަ ދައްކައިގެން ދަންނަވާނަން ތި ވިދާޅުވި ކަންތައް އޮންނަ ގޮތް މިހާރަށްވުރެ ހަރުދަނާ ކޮށް އެ ކަމުގައި ޓްރީޓްމެންޓް އެއްކޮށް ކޮމްޕްލީޓްކޮށް ނިންމޭނެ ގޮތް ހަމަޖައްސަން ޖެހޭ ކަންތައްތައް ގާނޫނީ އިމުގެ ތެރެއިން ހަމަޖައްސަން
ރައީސް މުއިއްޒު ސަރުކާރުން ޑްރަގުގެ މައްސަލަ ދެކެނީ ގައުމީ ސަލާމަތާ ގުޅުންހުރި މައްސަލައެއް ގޮތުގައެވެ. އެކަމަށް އަހައްމިއްޔަތު ދިނުމުގެ ގޮތުން ނިމިދިޔަ ސަރުކާރުގައި ހެލްތް މިނިސްޓްރީގެ ދަށުން ހިންގަމުން ދިޔަ އެންޑީއޭގެ ހިންގުން މި ސަރުކާރުން ވަނީ ހޯމްލޭންޑް ސެކިއުރިޓީ މިނިސްޓްރީގެ ދަށަށް ބަދަލުކޮށްފައެވެ.
ޑްރަގު ކޯޓުން އަމުރުކޮށްގެން ފަރުވާ ބޭނުންވާ 700 މީހަަކު އެބަތިބި ކަމަށް މިދިޔަ އަހަރު ޑިސެމްބަރު މަހު އެންޑީއޭއިން ބުނެފައިވެއެވެ.
Ads by STO
