އެމްޑީޕީއަށް މެޖޯރިޓީ ލިބިއްޖެނަމަ އިގްތިސާދު އަނދަވަޅަކަށް ވެއްޓޭނެ: ރައީސް
މިހާރު މަޖިލިސް މެޖޯރިޓީއޮތް އިދިކޮޅު މައި ޕާޓީ އެމްޑީޕީއަށް ކުރިއަށް އޮތް މަޖިލިސް އިންތިހާބުގައި މެޖޯރިޓީ ލިބިއްޖެނަމަ، މިސްރާބު އޮޔާ ގޮސް، އިގްތިސާދު އަނދަވަޅަކަށް ވެއްޓިގެންދާނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
ރައީސް އެހެން ވިދާޅުވީ ހޮޅުދޫ ދާއިރާގެ ޕީއެންސީ ކެންޑިޑޭޓު އަބްދުއްސައްތާރު މުހައްމަދު (ސަޓޯ)ގެ ޖަގަހަ ހުޅުވުމަށް ބޭއްވި ރޭ ބޭއްވި ރަސްމިއްޔާތުގައެވެ.
ރައްޔިތުންގެ ހައްގުގައި ސަރުކާރުން ގެންދަން ބޭނުންވާ މަޝްރޫއުތަކާއި، ސިޔާސަތުތަކާއި ޕްރޮގްތާމްތަކާއި ދެކޮޅަށް އެމްޑީޕީ މެޖޯރިޓީ އޮތް މަޖިލީހުން ކަންތައްތައް ކުރަމުންދާ ކަމަށް ރައީސް ތުހުމަތު ކުރެއްވިއެވެ.
ރައީސް ވިދާޅުވީ، ސޮވަރިން ޑިވެލޮޕްމަންޓު ފަންޑު ހިމާޔާތްކުރުމާއި ބެހޭ ބިލެއް މަޖިލީހަށް ހުށަހެޅުމުން، މަޖިލީހުގެ އިއްޔެގެ ޖަލްސާގައި ސޮވަރިން ޑިވެލޮޕްމަންޓު ފަންޑުގެ ބިލު ބޭރުކޮށްލީ އެއްވެސް ސަބަބަކާ ނުލާކަމަށެވެ.
"އެންމެ މިސާލަކުން ވެސް އެބަ ދޭހަކޮށްދޭ ސަރުކާރާއި ދެކޮޅަށް، ރައްޔިތުންގެ ހައްގުގައި ގެންދަން ބޭނުންވާ މަޝްރޫއުތަކާއި، ސިޔާސަތުތަކާއި، ޕްރޮގްރާމުތަކާއި ދެކޮޅަށް މަސައްކަތްކުރާނެ ބަޔަކު ހޮވައިގެން ރައްޔިތުންނަށް ވާނެ ފައިދާއެއް ނެތްކަން. ވާނީ ގެއްލުންކަން. ގެއްލުމުގެ މައްޗަށް ވާނީ ގެއްލުންކަން. މިސްރާބު ދާނީ އަނެއްކާވެސް އޮޔާކަން. އަނދަވަޅަކަށްކަން އިގްތިސާދު ވެއްޓިގެންދާނީ އެ މިސްރާބުގައި ގެންގޮއްސިއްޔާ"
މިދިޔަ ސަރުކާރުން ސޮވެރިން ފަންޑުގައި ހުރި ޑޮލަރު ރުފިޔާއަށް ބަދަލުކުރި ކަމަށާއި، މި ފަންޑަކީ ދަރަނިތަކަށް ބޭނުންކުރަން ހުރި ފަންޑެއްގެ ބަދަލުގައި އެކި ކަހަލަ ބޭނުން ޖެހުމުން ބޭނުންކުރާ އެއްޗަކަށްވެފައިވާކަން ރައީސް ފާހަގަކުރެއްވިއެވެ.
އަދި މި ސަރުކާރުގައި އެ ފަންޑަކީ، ރުފިޔާގެ ބަދަލުގައި ޑޮލަރު ޖަމާކުރާ ފަންޑެއްގެ ގޮތުގައި ބަންދުކޮށް އެ ފަންޑަށް ހާއްސަ ގާނޫނެއް ރައްޔިތުންގެ މަޖިލިސް ތެރެއިން ފާސްކުރަން ބޭނުންވާކަން ފާހަގަކުރެއްވިއެވެ. އަދި މިއީ ރާއްޖޭގެ އިގްތިސާދު ހަމަމަގަށް އެޅުވުމަށް ކޮންމެހެން ކުރަން ޖެހޭ ކަމެއް ކަމަށް ރައީސް ވިދާޅުވިއެވެ.
