ދައުރުވަނީ މާ ކުރީގެ ފޮޓޯއެއް: ނިޝާން
ކުރީގެ ރައީސް އަބްދުﷲ ޔާމީން އުފައްދަން މަސައްކަތް ކުރާ ޕީޕަލްސް ނެޝަނަލް ފްރަންޓުގެ ޓިކެޓުގައި ހެންވޭރު ދެކުނު ދާއިރާއަށް ވާދަ ކުރައްވާ ކެންޑިޑޭޓު އިބްރާހިމް މުހައްމަދު (ނިޝާން) އިދިކޮޅު އެމްޑީޕީއަށް ތާއީދުކުރި ކަމަށް ބުނެ ދައުރުވަމުންދަނީ މާ ކުރީގެ ފޮޓޯއެއް ކަމަށް އޭނާ ބުނެފިއެވެ.
އިއްޔެ ރައީސް ޑރ މުހައްމަދު މުއިއްޒު ހެންވޭރު ދާއިރާގައި ޑޯޓުޑޯ އަށް ހިންގެވި ހަރަކާތުގައި ނިޝާން ވަނީ އޭނާގެ ތާއިދު އޮތީ ޕީޕީއެމް/ޕީއެންސީގެ ޓިކެޓުގައި ވާދަކުރައްވާ ހުސައިން އިމްރާން ލަތީފް (އިންމު) އަށްކަން ހާމަކުރައްވާފައެވެ. ރައީސްއާ އެކު ފޮޓޯވެސް ނަންގަވާފައެވެ.
އެކަމަކު އޭގެ ފަހުން ފަސް ގަޑިއިރުވެސް ނުވަނީސް ސަރުކާރަށް ކުރި ތާއިދު ނިޝާން ވަނީ އަނބުރާ ގެންގޮސްފައެވެ. އެކަން އެމްޑީޕީން ވަނީ ޔަގީންވެސް ކޮށްދީފައިވެއެވެ. ނަމަވެސް، ނިޝާން މިރޭ އެކްސްގައި ކުރި ޕޯސްޓެއްގައި ބުނެފައިވަނީ، އެމްޑީޕީއަށް ތާއިދުކުރި ކަމަށް ބުނެ ދައުރުވަމުންދަނީ މާ ކުރީގެ ފޮޓޯއެއް ކަމަށާއި، އެމްޑީޕީއަށް އޭނާ ތާއިދު ނުކުރާ ކަމަށެވެ.
Ads by STO
