މަޖިލިސް ކެމްޕޭނަށް ދައުލަތުގެ ވަސީލަތްތައް ބޭނުންނުކުރަން ޓްރާންސްޕޭރެންސީން ގޮވާލައިފި
ކުރިއަށް އޮތް 20 ވަނަ ރައްޔިތުންގެ މަޖިލިސް އިންތިހާބުގެ ރަސްމީ ކެމްޕެއިނުގައި ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރަމުންދާ ކަމަށް ބުނެ، އެކަން އެގޮތަށް ނުކުރުމަށް ޓްރާންސްޕޭރެންސީ މޯލްޑިވްސްއިން އެދިއްޖެއެވެ.
ޓްރާންސްޕޭރެންސީން ނެރުނު ބަޔާނެއްގައި ބުނީ، މަޖިލިސް އިންތިހާބާއި ދިމާކޮށް ވައުދުތައްވެ، ވޯޓުލާން ތިބޭ މީހުންނަށް މިނިވަންކަމާ އެކު ވޯޓުލުމަށް ނުފޫޒު ފޯރުވަމުންދާ ކަމަށެވެ.
މަޖިލިސް އިންތިހާބުގެ ރަސްމީ ކެމްޕޭން ފެށުން ފަހުން، ހާއްސަކޮށް ކެމްޕޭން ޒިޔާރަތްތަކުގައި ތަރައްގީގެ ގިނަ މެގަ މަޝްރޫއުތަކެއް އިއުލާނުކުރަމުންދާތީ ޓްރާންސްޕޭރެންސީން ވަނީ ކަންބޮޑުވުން ފާޅުކޮށްފައެވެ.
ދެފުށް ފެންނަ ޕްލޭނެއް ނުވަތަ ތަރައްގީގެ ސްޓްރެޓެޖީ އެއް ނެތި އިންފްރާސްޓްރަކްޗާ މަޝްރޫއުތަކާއި އިޖްތިމާއީ އިގްތިސާދީ ސިޔާސަތުތައް ބަދަލުކުރަމުންދާކަން ފާހަގަކޮށް، ޓްރާންސްޕޭރެންސީން ބުނީ މިކަން ކުރަމުންދަނީ އިޖްތިމާއީ، އިގްތިސާދީ އަދި ތިމާވެށީގެ އަސަރުތަކަށް ބެލުމެއް ނެތި ކަމަށެވެ. އަދި މަޝްވަރާގެ މަރުހަލާތައް ވެސް ފުރިހަމަނުކޮށް ކަމަށެވެ.
އަދި އެކަމުގެ ސަބަބުން ވޯޓުލާ މީހުންނަށް މިނިވަންކަމާއެކު ކެންޑިޑޭޓަކު ހޮވުމުގެ ހައްގަށް ނުފޫޒު ފޯރަމުންދާ ކަމަށް ބުނެ، ކަންބޮޑުވުން ފާޅުކުރިއެވެ.
ދައުލަތުގެ ވަސީލަތްތައް ނަހަމަގޮތުގައި ބޭނުންކުރުން ހުއްޓުވައި، އެ ވަސީލަތްތައް ބޭނުންކުރުމާ ބެހޭ ގޮތުން އެންޓި ކޮރަޕްޝަން ކޮމިޝަނުން ކަނޑައަޅާފައިވާ ގައިޑްލައިންތައް ޕްރޮއެކްޓިވްކޮށް ތަންފީޒުކުރުމަށް ގޮވާލައިފައިވެއެވެ.
އަދި އެންޓި ކޮރަޕްޝަން ކޮމިޝަނާއި އެޓާނީ ޖެނެރަލްގެ އޮފީހާއި މަޖިލިސް ހިމެނޭ ގޮތަށް ކަމާބެހޭ އިދާރާތައް ގުޅިގެން ދައުލަތުގެ ވަސީލަތްތަކުގެ ބޭނުންކުރަމުންދާ ސިޔާސީ ފަރާތްތައް ޖަވާބުދާރީ ކުރުމުގައި ހުރި ގާނޫނީ 'ލޫޕް ހޯލްސް'' އިސްލާހުކުރުމަށް ގޮވާލައިފައިވެއެވެ. އިސްލާހުކުރުމަށް ލަފާދީފައިވާ ކަންތައްތަކުގެ ތެރޭގައި އާ މަޝްރޫއުތައް އިއުލާނުކުރާނެ ދުވަސްތައް ކަނޑައެޅުމާއި، މަޝްރޫއުތައް ފެށުން އަދި ނިމުން ރަސްމިއްޔާތަކުން ފާހަގަކުރުން ހިމަނާފައިވެއެވެ.
ނިމިދިޔަ ފަސް އަހަރު ނިދާފަ ހޭލެވިއްޖެދޯ ވެރިކަން ކުރަން އެހެން ބަޔަކު އައިމަ ހޭލެވުނީ ތޯ. ؟