ކުނި ކަހަން ހުރި މީހެއްގެ ގައިގައި ސައިކަލުން ޖެހި އެކްސިޑެންޓުވުމުން ފިލައިފި
މާލޭ މަގުމަތީގައި ކުނި ކަހަން ހުރި މީހެއްގެ ގައިގައި ސައިކަލުން ޖެހި އެކްސިޑެންޓުވުމުން, މަޑުނުކޮށް ފިލައިފިއެވެ.
ފުލުހުން މިއަދު ބުނީ އިއްޒުއްދީން މަގުގައި ކުނި ކަހަން ހުރި މީހެއްގެ ގައިގައި އެ މަގުން ދުއްވާފައި ދިޔަ ސައިކަލަުން ޖެހި އެކްސިޑެންޓެއް ހިނގާފައިވާ ކަމުގެ ރިޕޯޓު ލިބިފައިވަނީ ރޭ 11:17 ހާއިރު ކަމަށެވެ.
އެކްސިޑެންޓު ހިނގި ވަގުތު ސައިކަލުގައި ދެ މީހަކު ތިބި ކަމަށާއި އެކްސިޑެންޓުވުމުން އެ ދެ މީހުން ފިލާފައިވާ ކަމަށް ފުލުހުން ބުނެފައިވެއެވެ. ފުލުހުން ބުނީ އެ ސައިކަލާއެކު ދެ މީހުން ހޯދުމުގެ މަސައްކަތް ކުރަމުން އަންނަ ކަމަށެވެ.
މި އެކްސިޑެންޓުގައި ސައިކަލުން ޖެހިފައިވަނީ އުމުރުން 48 އަހަރުގެ އަންހެނެއްގެ ގައިގައެވެ. އޭނާއަށް އައިޖީއެމްއެޗްގައި ފަރުވާ ދެމުން އަންނަ ކަމަށް ފުލުހުން ބުންޏެވެ.
މި މައްސަލައާ ގުޅޭ އިތުރު ތަފްސީލެއް ފުލުހުން އާންމު ކޮށްފައިނުވެއެވެ.
އެކްސިޑެންޓު ވުމުން މަޑުނުކޮށް ފިލައިގެން ދިއުމަކީ މި ފަހުން އާންމުވެފައިވާ ކަމަށެވެ. ރޯދަ މަސް ތެރޭގައި އެކްސިޑެންޓުތައް ގިނަވެފައިވާއިރު, މީގެ ކުރިން ވެސް މަޑުނުކޮށް ފިލައިގެން ދިއުމާއި ދާން މަސައްކަތް ކުރުމުގެ މައްސަލަތައް ފެންމަތިވެފައިވެއެވެ.
