އެތުލެޓިކްސް އެސޯސިއޭޝަންގެ އިންތިހާބަށް ކުރިމަތިލާން ހުޅުވާލައިފި
އެތުލެޓިކްސް އެސޯސިއޭޝަން އޮފް މޯލްޑިވްސްގެ ހިންގާ ކޮމިޓީގެ ދައުރު ހަމަ ވާތީ، އެ ކޮމިޓީގެ މެންބަރު ކަމަށް ކުރިމަތިލާން ހުޅުވާލައި އިއުލާންކޮށްފި އެވެ.
ހިންގާ ކޮމިޓީގެ މަގާމުތަކަށް ކުރިމަތިލާން ހުޅުވާލީ މި މަހު 15 ދުވަހުގެ މެންދުރު 12:00 ގެ ނިޔަލަށެވެ. އަދި އިންތިހާބު ބޭއްވުމަށް ނިންމާފައިވަނީ މި މަހު 24 ވަނަ ދުވަހެވެ.
ހިންގާ ކޮމިޓީގައި ތިބޭނީ އެސޯސިއޭޝަންގެ ރައީސް، ނައިބު ރައީސް، ހަޒާންދާރު، ހިންގާ ކޮމިޓީގެ ތިން މެންބަރުން، އަދި ހިންގާ ކޮމިޓީއަށް އިންތިހާބުކުރާ އަންހެން މެންބަރެވެ.
މިދިޔަ ތިން ދައުރު އެތުލެޓިކްސް އެސޯސިއޭޝަންގެ ރައީސް މަގާމުގައި ހުންނެވީ، މިހާރު ސްޕޯޓްސް ކޮމިޝަނަރަކަށް ހުންނެވި މުހައްމަދު ތޮލާލެވެ.
ތޮލާލް ސްޕޯޓްސް ކޮމިޝަނަރުގެ މަގާމަށް އައްޔަންކުރީ ނޮވެމްބަރު 21، 2023 ގައެވެ. އެއަށްފަހު އޭނާ މަގާމުން އިސްތިއުފާ ދެއްވުމުން އެސޯސިއޭޝަން ހިންގެވުމާ ހަވާލުވީ ނައިބު ރައީސް އަހުމަދު އަޒީލެވެ.
