ގޯތި ހަވާލުކުރަން ފާސްކުރި ބިލު ތަސްދީގުނުކޮށް އަނބުރާ މަޖިލީހަށް
ދިރިއުޅުމަށް ދޫކުރާ ބަންޑާރަ ގޯތި ލިބޭ މީހުން ކަނޑައަޅައި ގޯތި ލިބޭ މީހުންގެ ދާއިމީ ލިސްޓް ގެޒެޓުގައި ޝާއިއުކުރާ ތާރީހުން ފެށިގެން ގިނަވެގެން ތިން މަސް ދުވަހުގެ ތެރޭގައި އެ ގޯތި ހަވާލުކުރަން ޖެހޭ ގޮތަށް ރައްޔިތުންގެ މަޖިލީހުން ފާސްކުރި ބިލު ތަސްދީގުނުކޮށް އަނބުރާ މަޖިލީހަށް ފޮނުވައިފިއެވެ.
މަޖިލީހުން އެ ބިލާ މެދު އަނބުރާ ވިސްނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެދިވަޑައިގެން، ބިލު އަނބުރާ ފޮނުވި ކަން ހާމަކުރީ، ރައީސް އޮފީހުގެ ވެބްސައިޓުގައި ޝާއިއުކުރި ހަބަރަކުންނެވެ.
ގޯތި ދޫކުރި އިދާރާއަކުން އެ ގޯތިތައް ލިބުނު މީހުންނަށް 3 މަސް ދުވަހުގެ ތެރޭގައި ގޯތި ހަވާލުކުރަންޖެހޭ ގޮތަށް ރާއްޖޭގެ ބިމާބެހޭ ގާނޫނަށް އިސްލާހު ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމެވެ.
މީކާއީލް ހުށަހެޅުއްވި ބިލުގައި ވަނީ ގޯތި ލިބޭ މީހުންގެ ދާއިމީ ލިސްޓް ގެޒެޓްކުރާ ތާރީހުން ފެށިގެން 6 މަސް ތެރޭގައި ގޯތި ހަވާލުކުރާ ގޮތަށެވެ. ނަމަވެސް ބިލު ދިރާސާކުރުމުގެ މަރުހަލާގައި ވަނީ އެ މުއްދަތު ތިން މަސް ދުވަހަށް މަދުކޮށް، އެގޮތަށް ފާސްކޮށްފައެވެ. މަޖިލީހުގެ ތަޅުމުން ފާސްކުރީ ކޮމިޓީން ނިންމި ގޮތަށެވެ.
ގޯތި ލިބޭ މީހުންގެ ދާއިމީ ލިސްޓް ގެޒެޓްގައި ޝާއިއުކޮށް ރަޖިސްޓަރީ ވަކި މުއްދަތެއްގައި ހަވާލު ކުރަން ޖެހޭ ގޮތަށް ވެސް ގާނޫނަށް ވަނީ އިސްލާހު ގެނެސްފައެވެ.
އެ ގޮތުން ގާނޫނަށް ގެނެސްފައިވާ އިސްލާހުގައިވާ ގޮތުން، ބަދަލުދޭން ނުޖެހޭ ހާލަތްތަކުގައި ބިންތަކުގެ ރަޖިސްޓްރީ ތިން މަސް ދުވަހުގެ ތެރޭގައި ހަވާލު ކުރަން ޖެހެއެވެ. އަދި ބަދަލު ދޭން ޖެހޭ ހާލަތުގައި ހުރި ބިންތަކުގެ ރަޖިސްޓަރީ އެއް އަހަރުގެ ތެރޭގައި ހަވާލު ކުރަން ޖެހެއެވެ.
