ވާދަވެރިން ހަސަދަވިޔަސް ރައީސްގެ ތެދުވެރިކަން ރައްޔިތުން ބަލައިގަނޭ: އަބްދުއްރަހީމް
ވާދަވެރިން ހަސަދަވިޔަސް ރައީސް ޑރ. މުހައްމަދު މުއިއްޒުގެ ތެދުވެރިކަން ދިވެހި ރައްޔިތުން ބަލައިގަންނަ ކަމަށް އެމަނިކުފާނުގެ އޮފީހުގެ ސީނިއާ މިނިސްޓަރު އަބްދުއްރަހީމް އަބްދުﷲ ވިދާޅުވެއްޖެ އެވެ.
ސަރުކާރަށް ހަ މަސް ދުވަސް ފުރިހަމަވެ، ރައްޔިތުންގެ މަޖިލީހުގެ ސުޕަ މެޖޯރިޓީ ސަރުކާރަށް ލިބި އަދި އަމިއްލަ ގޮތުން އިންތިހާބުވި މެންބަރުން ވެސް ސަރުކާރާ ގުޅެމުންދާ ދަނޑިވަޅުގައި އަބްދުއްރަހީމް ވަނީ އެ ހުރިހާ ކާމިޔާބީތަކުގެ އަސްލަކީ ރައީސްގެ ތެދުވެރިކަން ކަމަށް ސިފަކުރައްވައި ޕޯސްޓެއް ކުރައްވައިފަ އެވެ.
އަބްދުއްރަހީމްގެ ރަސްމީ އެކްސް އެކައުންޓުން ކުރެއްވި ޕޯސްޓެއްގައި ލިޔުއްވީ ވެރިއެއްގެ ފަރާތުން ރައްޔިތުން ދެކެން ބޭނުން ވާނެ އެންމެ މުހިންމު ސިފަޔަކީ ތެދުވެރިކަމާއި އިހުލާސްތެރިކަމުގެ މާތް ސިފަ ކަމަށެވެ. ހަގީގީ މާނައެއްގައި ވެރިއެއްގެ ފަރާތުން އެ ސިފަ ފެނުމުން ރައްޔިތުންގެ ގަދަރާއި އިހުތިރާމު އެ ވެރިއަކަށް ލިބިގެންދާނެ ކަމަށް ލިޔުއްވާފައިވެ އެވެ.
"ރައްޔިތުންގެ ހުސްވުމެއް ނެތް ލޯބިދާނީ އެ ވެރިޔަކަށް އޮހެމުން، އެ މަންޒަރު ވާދަވެރިންނަށް ފެނުމުން ހަސަދަވެރިކަން ހައްދު ފަހަނައަޅާދާނެ، މިއީ ދުނިޔެ ދައްކާ ޙަގީގަތް، ފެންނަމުން މިދަނީ އެ ކަން،" މަޖިލީހުގެ ފޮނަދޫ ދާއިރާގެ އިންތިހާބީ މެންބަރު އަބްދުލްރަހީމް ލިޔުއްވާފައިވެ އެވެ.
ސަރުކާރު ހިންގާ ޕީއެންސީގެ ޗެއާޕާސަންގެ މަގާމު ވެސް ފުރުއްވާ އަބްދުއްރަހީމް އޭނާގެ ޕޯސްޓް ނިންމައިލަމުން ލިޔުއްވާފައިވަނީ، ރައީސް ޑރ. މުއިއްޒު މިހާތަނަށް ހޯއްދެވި ކާމިޔާބީތަކުގެ ސިއްރަކީ އެމަނިކުފާނުގެ އިހުލާސްތެރި މަސައްކަތާއި އެ މަސައްކަތް ރައްޔިތުން ބަލައިގަތް ކަން ކަމަށެވެ.
ޕީއެންސީގެ 66 ކެންޑިޑޭޓާއި، ސަރުކާރުގެ ތާއީދު އޮވެގެން އަމިއްލަ ގޮތުން ވާދަކުރި ހަ ކެންޑިޑޭޓެއް އިންތިހާބު ކާމިޔާބު ކުރި އެވެ. އަދި ސަރުކާރުގެ ތާއީދު އޮވެގެން ނުކުތް އެމްޑީއޭ، އެމްއެންޕީ، އަދި ޖުމްހޫރީ ޕާޓީގެ ލީޑަރުން އިންތިހާބު ކުރި އެވެ. އެއާ އެކީ ސަރުކާރަށް 75 ގޮނޑި ލިބުނެވެ.
ދެން ވެލިދޫ ދާއިރާއަށް އިންތިހާބުވި އެމްޑީއޭގެ މުހައްމަދު އައްބާސް ސަރުކާރާ އެކު މަސައްކަތް ކުރައްވާނެ އެވެ. އޭގެ އިތުރުން އަމިއްލަ ގޮތުން ވާދަކުރައްވައިގެން ގޮނޑި ހޯއްދެވި ދެ މެންބަރަކު ޕީއެންސީއަށް ސޮއިކުރެއްވުމުން ސަރުކާރުން ބޭނުންވާނެ ގޮތަށް ވޯޓު ދެއްވާނެ މެންބަރުންގެ އަދަދު 78 އަށް އަރަ އެވެ.
