ލަންކާ ފޮރިން މިނިސްޓަރުގެ ދައުވަތަކަށް ޒަމީރު އެގައުމަށް ވަޑައިގަންނަވަނީ
މިނިސްޓަރ އޮފް ފޮރިން އެފެއާޒް މޫސާ ޒަމީރު، އަންނަ ޖޫން މަހުގެ 3 އިން 6 އަށް ސްރީލަންކާގެ ވެރިރަށް ކޮލޮމްބޯއަށް ރަސްމީ ދަތުރުފުޅެއް ކުރައްވާނެކަމަށް އެ މިނިސްޓްރީން ބުނެފި އެވެ.
ފޮރިން މިނިސްޓްރީން މިއަދު ބުނީ މި ދަތުރުފުޅަކީ ސްރީލަންކާގެ މިނިސްޓަރ އޮފް ފޮރިން އެފެއާޒް އެމް.ޔޫ.އެމް. ޢަލީ ސަބްރީގެ ދަޢުވަތަކަށް ކުރައްވާ ރަސްމީ ދަތުރުފުޅެއް ކަމަށެވެ.
އެ މަނިކުފާނުގެ މި ދަތުރުފުޅުގައި އެ ޤައުމުގެ ސަރުކާރުގެ އިސް ބޭފުޅުންނާއި ބައްދަލު ކުރެއްވުމަށްވަނީ ހަމަޖެހިފަ އެވެ. އޭގެތެރޭގައި އެޤައުމުގެ ރައީސް، ރަނިލް ވިކްރަމަސިންގްހެ އާއި ބޮޑުވަޒީރު، ޑިނޭޝް ގުނަވަރދެނާ ހިމެނެ އެވެ.
އަދި އެ ޤައުމުގެ ފޮރިން މިނިސްޓަރާ ބައްދަލުކުރައްވާ ރަސްމީ ވާހަކަތައް ދެއްކުމަށް ހަމަޖެހިފައިވެ އެވެ. މިނިސްޓްރީން ބުނީ ރަސްމީ ވާހަކަތަކުގެ ތެރޭގައި ދިވެހިރާއްޖެއާއި ސްރީލަންކާއާއި ދެމެދު އޮތް ޒަމާންވީ ގުޅުން ހަރުދަނާ ކުރުމުގެ މަޝްވަރާތައް ކުރިއަށްދާނެ ކަމަށެވެ. އަދި މީގެ އިތުރުން ސްރީލަންކާގައި ދިރިއުޅޭ ދިވެހި ރައްޔިތުންނަށް ލުއިފަސޭހަ ގޮތްތައް ހޯދާ ދިނުމާ ގުޅޭގޮތުން މަޝްވަރާކުރުމަށް ހަމަޖެހިފައިވާކަމަށްވެސް މިނިސްޓްރީން ބުންނެވެ.
މިނިސްޓަރު ޒަމީރު ސްރީލަންކާއަށް ކުރައްވާ މި ރަސްމީ ދަތުރުފުޅަކީ، އެ މަނިކުފާނު މިނިސްޓަރ ކަމުގެ މަޤާމާ ހަވާލުވެވަޑައިގަތުމަށްފަހު ސްރީލަންކާއަށް ކުރައްވާ ފުރަތަމަ ދަތުރުފުޅެވެ.
Ads by STO
