ރާއްޖެ-އީޔޫ ބައްދަލުވުން މާދަމާ، އެޖެންޑާގައި ޑިފެންސްއާއި ޖުޑިޝަރީގެ ވާހަކަ!
ޔޫރަޕިއަން ޔޫނިއަން (އީޔޫ)ގެ އިސް އޮފިޝަލުންނާއި ދިވެހި ސަރުކާރުގެ މަންދޫބުން ދެމެދު ބާއްވާ ސިލްސިލާ މަޝްވަރާ ބައްދަލުވުންތަކުގެ ފަސްވަނަ ބައްދަލުވުން މާދަމާ ބޭއްވުމަށް ހަމަޖެހިއްޖެ އެވެ.
ފޮރިން މިނިސްޓްރީން ނެރުނު ބަޔާނެއްގައި ބުނި ގޮތުގައި އީޔޫގެ އިސް އޮފިޝަލުންނާއެކު ބާއްވާ ބައްދަލުވުމުގެ އެޖެންޑާގައި ހިމެނޭ ކަންކަމަކީ ޝަރުއީ ދާއިރާގެ އިސްލާހުތަކާއި، ސަލާމަތާ ގުޅުން ހުރި ކަންކަމުގެ އިތުރުން ޑިމޮކްރެޓިކް އިސްލާހުތަކާއި މޫސުމީ ބަދަލުތައް ވެސް ހިމެނެ އެވެ.
މި ބައްދަލުވުމުގައި ރާއްޖެ ތަމްސީލްކުރުމަށް އިސްކޮށް ހުންނާނީ ފޮރިން ސެކްރެޓަރީ ފާތިމަތު އިނާޔާ އެވެ. އަދި ޔޫރަޕިއަން ޔޫނިއަންގެ ވަފުދުގެ އިސް ވެރިއަކަށް ހުންނެވީ ޔޫރަޕިއަން އެކްސްޓާނަލް އެކްޝަން ސާވިސްގެ އޭޝިއާ އެންޑް ޕެސިފިކް ޑިޕާޓްމަންޓުގެ ޑެޕިއުޓީ މެނޭޖިން ޑިރެކްޓަރު ޕައޮލާ ޕަމްޕަލޯނީ އެވެ.
ފޮރިން މިނިސްޓްރީގެ އިތުރުން، ރައީސް އޮފީހާއި ފިނޭންސް މިނިސްޓްރީއާއި، އިކޮނޮމިކް މިނިސްޓްރީއާއި، ފިޝަރީޒް މިނިސްޓްރީއާއި، އެޓާނީ ޖެނެރަލް އޮފީހާއި، އެންވަޔަރަމަންޓް މިނިސްޓްރީ، ނެޝަނަލް ކައުންޓަ ޓެރަރިޒަމް ސެންޓާ، އެމްއެންޑީއެފް، އަދި ފުލުހުން ބައިވެރިވުމަށް ހަމަޖެހިފައިވެ އެވެ.
