ލަންކާގައި ދިރިއުޅޭ ދިވެހިންނާ، ފޮރިން މިނިސްޓަރު ބައްދަލު ކުރައްވައިފި
ތިން ދުވަހުގެ މުއްދަތަކަށް އަވައްޓެރި ސްރީލަންކާގައި ފޮރިން މިނިސްޓަރު ކުރައްވާ ރަސްމީ ދަތުރުފުޅުގެ ތެރެއިން އެ ގައުމުގައި ދިރިއުޅޭ ދިވެހިންނާ މިނިސްޓަރު މިއަދު ބައްދަލު ކުރައްވައިފިއެވެ.
ލަންކާގައި އުޅޭ ދިވެހިންނަށް ބޭއްވި އެ ބައްދަލުވުން އޮތީ ލަންކާގައި ހުންނަ ދިވެހި އެމްބަސީގަ އެވެ. އެ ބައްދަލުވުމުގައި ލަންކާގައި އުޅޭ ދިވެހިންނަށް ވިސާގެ ކަންކަން ފަސޭހަކޮށްދިނުމަށް ވާހަކަތަކެއް ދެކެވުނު ކަމަށް އެ ބައްދަލުވުމުގައި ބައިވެރިވި ދިވެއްސަކު މައުލޫމާތު ދިނެވެ.
މިނިސްޓަރު ޒަމީރު ލަންކާއަށް ވަޑައިގެންނެވީ، އެ ގައުމުގެ ފޮރިން މިނިސްޓަރު އަލީ ސަބްރީގެ ދައުވަތަކަށެވެ.
މި ދަތުރުގައި ސްރީލަންކާގެ ރައީސް ރަނިލް ވިކްރަމަސިންގެ އިތުރުން އެގައުމުގެ ބޮޑުވަޒީރު، ޑިނޭޝް ގުނަވަދެނާއާ ބައްދަލު ކުރެއްވުމަށް ވަނީ ހަމަޖެހިފައެވެ. އަދި އެ ގައުމުގެ ފޮރިން މިނިސްޓަރާ ބައްދަލު ކުރައްވައި ރަސްމީ ވާހަކަތައް ބޭއްވުމަށް ވެސް ހަމަޖެހިފައިވާ ކަމަށް ފޮރިން މިނިސްޓްރީން ބުންޏެވެ.
ސްރީލަންކާގައި ދިރިއުޅޭ ދިވެހި ރައްޔިތުންނަށް ލުއި ފަސޭހަ ގޮތްތައް ހޯދާ ދިނުމާ ގުޅޭ ގޮތުން މަޝްވަރާ ކުރުމަށް ވެސް ހަމަޖެހިފައިވާ ކަމަށް މިނިސްޓްރީން ބުންޏެވެ.
