ލަންކާގެ ފޮރިން މިނިސްޓަރު ރާއްޖެ ވަޑައިގަތުމަށް ދައުވަތު ދީފި
ރަސްމީ ދަތުރެއްގައި ރާއްޖެއަށް ޒިޔާރާތް ކުރުމަށް ސްރީލަންކާގެ ފޮރިން މިނިސްޓަރު އަލީ ސަބްރީއަށް ދައުވަތު އަރުވައިފިއެވެ.
ރާއްޖޭގެ ފޮރިން މިނިސްޓަރ މޫސާ ޒަމީރު މި ދައުވަތު އަރުވާފައިވަނީ ލަންކާގެ ފޮރިން މިނިސްޓަރާއެކު މިއަދު ބޭއްވި މަޝްވަރާ ބައްދަލުވުމުގައެވެ.
އެ ބައްދަލުވުމުގައި ވާހަކަ ދައްކަވަމުން ޒަމީރު ވިދާޅުވީ، އެ ދައުވަތު އަރުވާފައިވަނީ ދެ ގައުމުގެ ދެމެދުގައި މަޝްވަރާތައް އިތުރަށް ކުރިއަށް ގެންދިއުމަށް ކަމަށެވެ.
އޭގެއިތުރުން ޒަމީރު ވަނީ، ލަންކާ ސަރުކާރުގެ އޯގާތެރި މެހެމާންދާރީއަށްޓަކައި ޝުކުރު އަދާކޮށްފައެވެ. އަދި ރާއްޖެއިން ވެސް އެގޮތަށް މެހެމާންދާރީ އަދާކުރުމަށް ކެތްމަދުވެފައިވާ ކަމަށް ޒަމީރު ވިދާޅުވިއެވެ.
ޒަމީރު ލަންކާއަށް ވަޑައިގެންނެވީ އެގައުމުގެ ފޮރިން މިނިސްޓަރުގެ ދައުވަތަކަށް، ތިން ދުވަހަށެވެ.
މިނިސްޓަރު ޒަމީރު ސްރީލަންކާއަށް ކުރެއްވި މި ރަސްމީ ދަތުރުފުޅަކީ، އެ މަނިކުފާނު މިނިސްޓަރ ކަމުގެ މަގާމާ ހަވާލުވެވަޑައިގަތުމަށްފަހު ސްރީލަންކާއަށް ކުރެއްވި ފުރަތަމަ ދަތުރެވެ.
