މަޖިލިސް އިންތިހާބަށް ކުށްވެރިން ދޫކޮށްލި ކަމަށް ތުހުމަތުކޮށް، އަދަދު ބުނަން ގޮވާލައިފި
ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވި ފަހުން ރައްޔިތުންގެ މަޖިލީހުގެ އިންތިހާބަށް ޖަލުން ދޫކޮށްލި ކުށްވެރިންގެ އަދަދު ބުނަން ކުރީގެ ސަރުކާރުގެ ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ.
މާލެ ސަރަހައްދުގައި ވައްކަމާއި ފޭރުމާއި ބިރު ދެއްކުން ފަދަ ކުށްތައް އިތުރުވަމުން އަންނަ މައްސަލާގައި ފުލުހުންގެ ތަރުޖަމާނު އަހުމަދު ޝިފާން ވިދާޅުވީ އެހެންވީ އެއްވެސް އުސޫލެއް ނެތި މީގެ 10 މަސް ކުރިން ޖަލުން ކުށްވެރިންތަކެއް ދޫކޮށްލުމުން ކަމަށެވެ.
އެއީ ކުރީގެ ސަރުކާރުގައި ދޫކޮށްލި ކުށްވެރިންގެ ވާހަކަ އެވެ. ޝިފާން މިއަދު ވިދާޅުވި ގޮތުގައި 434 ކުށްވެރިން އޭރު ވަނީ ދޫކޮށްލައިފަ އެވެ.
އެ ސަރުކާރުގެ ޑިފެންސް މިނިސްޓަރު މާރިޔާ ކުރެއްވި ޕޯސްޓުގައި ވިދާޅުވީ މި ސަރުކާރު އައި ފަހުން ދޫކޮށްލި އަދަދު ވެސް ހާމަ ކުރަން ޖެހޭނެ ކަމަށެވެ.
"ރެސިޑިވިސްޓުންގެ އާދަކާދަ ދިރާސާތަކުން ދައްކާ ގޮތުގައި ކުށުގެ ވެށިން ދޫކުރާ މީހުން އަލުން ކުށްކުރުމަށް މުއްދަތެއް އޮންނަކަމަކަށް ދިރާސާތަކުން ނުދައްކާ، އައު ސަރުކާރު އައުމުންނާއި މަޖަލިސް އިންތިހާބަށް ސަރުކާރުން ދޫކުރި މީހުންގެ އަދަދު ހާމަކުރަން ގޮވާލަން،" މާރިޔާގެ ޓްވީޓު ޕޯސްޓުގައިވެ އެވެ.
ފުލުހުންގެ ތަފާސް ހިސާބުތަކުން ދައްކާ ގޮތުގައި މިއަހަރުގެ މިހާތަނަށް ވައްކަމާއި ފޭރުމުގެ 1000 އަށް ވުރެ ގިނަ މައްސަލަ ވަނީ ހުށަހަޅާފަ އެވެ. އެގޮތުން ވައްކަމުގެ 1680 މައްސަލަ ހުށަހަޅާފައިވާއިރު ފޭރުމުގެ 235 މައްސަލަ ހުށަހަޅާފައިވެ އެވެ.
