ބަކާ ނިޔާވުމުގެ ހިތާމައިގައި ޕީއެންސީގެ ހަރުގެ ޖަލްސާ ފަސްކޮށްފި
ރާއްޖޭގެ މަޝްހޫރު ފުޓްބޯޅަ ޝަހުސިއްޔަތު އަހުމަދު އާރިފް (ބަކާ) މިއަދުގެ ވަގުތެއްގައި ނިޔާވުމުން، ވެރިކަންކުރާ ޕީއެންސީން ކުރިއާލާ ރާވާފައިވާ ހަރުގެ ޖަލްސާ ފަސްކޮށްފި އެވެ.
ޕީއެންސީގެ ތަރުޖަމާނު އަދި މި ސަރުކާރުގެ ތަރުޖަމާނަކަށް ވެސް ހުންނެވި ހީނާ ވަލީދު ވިދާޅުވީ އާރިފް ނިޔާވުމުގެ ހިތާމައިގައި މިރޭ ބާއްވަން ހަމަޖެހިފައިވާ ހަރުގެ ޖަލްސާ އެހެން ރެއަކަށް ފަސްކޮށްފައިވާ ކަމަށެވެ.
ބަކާ ނިޔާވެފައިވަނީ ގައިން ގަޔަށް އަރާ ބައްޔެއް ކަމަށްވާ މެނެންޖައިޓިސް ޖެހިގެން ކަމަށް ހެލްތު މިނިސްޓްރީގެ އޮފިޝަލަކު ވަނީ "ދެން އޮންލައިން" އަށް ކަށަވަރުކޮށްދީފަ އެވެ.
ހައްޖުގެ އަޅުކަން އަދާކުރުމަށް ފަހު ރާއްޖެ އައިތަނާހެން ގަދަ ހުމެއް ޖެހިގެން އޭޑީކޭ ހޮސްޕިޓަލުގެ އައިސީޔޫގައި ބަކާ އެޑްމިޓްކުރި އެވެ.
ވެންޓިލޭޓަރުގައި ފަރުވާދެމުން ދަނިކޮށް ބަކާ ނިޔާވީ މިއަދުގެ ވަގުތެއްގަ އެވެ.
ބަކާއަކީ ރާއްޖޭގައި އުފެދުނު އެންމެ މޮޅު ޑިފެންސިވް މިޑްފީލްޑަރު ކަމަށް ގިނަ ބަޔަކު އިއްތިފާގުވެ އެވެ.
އަނިޔާގެ މައްސަލަތަކުގެ ސަބަބުން ނިމިދިޔަ ދެ ސީޒަންގައި ބަކާ ކުޅެފައެއް ނުވެއެވެ. އެކަމަކު ދާދި ފަހުން ކުރީގެ ކުޅުންތެރިންނަށް ހާއްސަކޮށް މާލޭގައި ކުރިއަށް ދިޔަ ސެވަން އަ ސައިޑް މުބާރާތެއްގައި އޭނާ ކުޅުނެވެ.
ރާއްޖެއަށް ފުޓުބޯޅަ ތާރީހުގައި ލިބުނު އެންމެ ބޮޑު ދެ ކާމިޔާބީ ކަމަށްވާ 2008 ވަނަ އަހަރުގެ ސާފް ޗެމްޕިއަންޝިޕާއި 2018 ވަނަ އަހަރުގެ ސާފް ޗެމްޕިއަންޝިޕް މުބާރާތް ކާމިޔާބު ކުރި ގައުމީ ޓީމުގެ ސްކޮޑުގައި ބަކާ ހިމެނެ އެވެ.
