މަޖިލިސް މެންބަރުންގެ މާލީ ބަޔާން ހާމަކުރާނީ އުސޫލާ އެއް ގޮތަށް އެއް އަހަރު ފަހުން!
ރައްޔިތުންގެ މަޖިލީހުގެ މެންބަރުންގެ މާލީ ބަޔާންތައް ހާމަކުރާނީ އެ ކަމަށް ކަނޑައެޅިފައިވާ އުސޫލާ އެއް ގޮތަށް އެއް އަހަރު ފަހުން ކަމަށް މަޖިލީހުގެ އިދާރާއިން ބުނެފި އެވެ.
މަޖިލީހުގެ އިދާރާއިން މި ކަން ފާހަގަ ކުރީ، ހާމަކަން ބޮޑު ދައުލަތެއް ހިންގުމަށް ވަކާލާތު ކުރާ ޓްރާންސްޕޭރެންސީ މޯލްޑިވްސް އިން މެންބަރުންގެ މާލީ ބަޔާންތައް ހާމަ ކުރުމަށް ގޮވާލާފައިވަނިކޮށެވެ.
މަޖިލީހުގެ ކޮމިއުނިކޭޝަން އެންޑް މީޑިއާ ޑިރެކްޓަރު ހުސައިން ޒިޔާއު މީޑިއާތަކަށް ފޮނުވި ޓެކްސްޓް މެސެޖެއްގައި، މަޖިލީހުގެ ގަވާއިދަށް ހަވާލާ ދީފައި ވަނީ، މަޖިލީހުގެ މެންބަރުންގެ މާލީ ބަޔާން ހުށަހަޅަން ވާނީ, އެ މެންބަރެއްގެ މެންބަރު ކަމުގެ ހުވާކުރާ ތާރީޚުން ފެށިގެން އެއް އަަހަރު ދުވަސް ފުރިހަމަ ވުމުން ކަމަށެވެ.
"އެހެން ކަމުން 20 ވަނަ ރައްޔިތުންގެ މަޖިލީހުގެ މެންބަރުންގެ މާލީ ބަޔާން ހުށަހަޅުއްވަން ޖެހޭނީ އަންނަ އަހަރުގެ މެއި 28 ވަނަ ދުވަހަށް އެއް އަހަރު ފުރުމަށް ފަހު, އަންނަ އަހަރުގެ އޯގަސްޓް 31 ގެ ކުރިންނެވެ." ޒިޔާއު ފޮނުވި މެސެޖުގައިވެ އެވެ.
އެހެންކަމުން ޓްރާންސްޕޭރެންސީ މޯލްޑިވްސްއިން ރައްޔިތުންގެ މަޖިލީހުގެ މެންބަރުންގެ މާލީ ބަޔާން ހާމަކުރުމަށް ގޮވާލާ ޓުވީޓުކޮށްފައިވަނީ މާލީ ބާޔާން ހާމަކުރަމުންދާ އުސޫލު ރަނގަޅަށް ސާފުނުކޮށް ކަމަށް އެ މެސެޖގައިވެ އެވެ.
އަދި 19 ވަނަ މަޖިލީހުގެ މެންބަރުންގެ ފާއިތުވި ހަތަރު އަހަރުގެ މާލީ ބަޔާން ރައްޔިތުންގެ މަޖިލީހުގެ ވެބްސައިޓުން ފެންނަން ހުންނާނެ ކަމާއި އެ މެންބަރުންގެ ފަސްވަނަ އަހަރުގެ މާލީ ބަޔާން އެ މެންބަރުން ހުށަހަޅުއްވާނީ މި އަންނަ އޯގަސްޓް މަހުގެ 31 ގެ ކުރިން ކަން ޒިޔާއު ފާހަގަ ކުރެއްވި އެވެ.
Ads by STO
