މަސައްކަތުގެ ހާސްކަމުގެ ވާހަކަ ދެއްކުން، ގާބިލުކަން ކުޑަކަމަށް ސިފަވާ ސަބަބަކަށް
މަސައްކަތަކީ ބައެއް ފަހަރު މީހާ ހާސްކުރުވާ ކަމެކެވެ. އެކަމަކު ބައެއް މީހުން ބަލަނީ އެއީ ޝަރަފެއް ކަމަށެވެ. އެކުގައި މަސައްކަތްކުރާ މީހުންނަށް ނުވަތަ ޓީމަށް ޓަކައި އެކަން ތަހައްމަލުކުރުމަށް ފަހު، އެފަދަ މީހުން އެ ހުރިހާ ވާހަކައެއް ކިޔައިދޭން ބޭނުންވެ އެވެ.
އެމެރިކާގެ ޔުނިވާސިޓީ އޮފް ޖޯޖިއާގެ ޓެރީ ކޮލެޖް އޮފް ބިޒްނަސް އިން ދާދި ފަހުން ކުރި ދިރާސާއަކުން ދެއްކި ގޮތުގައި އެގޮތަށް ކަންތައް ކުރުން، (ސްޓްރެސް ބްރެގިން) އަކީ މީހާގެ ގާބިލުކަން ކުޑަކަމަށް ސިފަވާ ކަމެކެވެ. އެކުގައި މަސައްކަތްުކުރާ މީހުން އެފަދަ މީހާއާ މެދު ހިތްހަމައެއް ވެސް ނުޖެހޭނެ އެވެ.
"މިއީ އަހަރެމެންނަށް ގިނައިން ފެންނަ ސިފައެއް އަދި މިއީ ހަޔާތުގެ ކޮންމެވެސް ހިސާބެއްގައި އަހަރެމެން ކޮންމެ މީހަކަށް މެ އެގޮތަަށް ކަންތައް ކުރެވިފައިވުމުގެ ކުށްވެރިކަން އިހުސާސްކުރާ ކަމެއް،" އެ ދިރާސާގެ އިސް މުސައްނިފު ޖެސިކާ ރޮޑެލް ސައިންސް ޑެއިލީއަށް ވިދާޅުވެފައި ވެ އެވެ.
އޭނާ ދެކެވަޑއިގަންނަވާ ގޮތުގައި އަހަރެމެން އެގޮތަށް ކަންތައް ކުރަނީ ރަނގަޅުކަން ސާބިތުކޮށް ދިނުމަށެވެ. އެކަމަކު އޭގެ ނަތީޖާ ގިނަ ފަހަރު ނުކުންނާނީ އޭނާ ވިދާޅުވެފައިވާ ގޮތުގައި އިދިކޮޅަށެވެ.
ޔުނިވާސިޓީ އޮފް ޖޯޖިއާގެ ދިރާސާގައި ހެދި ފުރަތަމަ ސާވޭގައި ބައިވެރިކުރި 360 ބައިވެރިން، އަޅައިކިޔަން ހަވާލުކުރީ ކޮންފަރެންސަކަށް ގޮސްފައި އެނބުރި އައި، އެކުގައި މަސައްކަތްކުރާ ހިޔާލީ ބައެއްގެ ވާހަކަތަކެކެވެ. ސާވޭގެ ބައިވެރިންނާ ހަވާލުކުރީ އެކުގައި މަސައްކަތްކުރާ ހިޔާލީ މީހުންނަށް ރުހޭ މިންވަރާއި ގާބިލުކަމާ މެދު ދެކޭ ގޮތާއި މަސައްކަތުގައި އެމީހުންނަށް އެހީތެރިވެދީފާނެ ކަމަށް ދެކޭ މިންވަރު ބެލުމަށެވެ.
ހިޔާލީ މީހުންގެ ތެރެއިން ހާސްކަމާ މެދު ފަހުވެރިވާ މީހާ ކޮންފަރެންސް ސިފަކުރީ "މިހާރު ވެސް ފުރިފައިވާ މަސައްކަތުގެ ފުންޏަކަށް އިތުރުވި ކަމެއް، އޭރު ވެސް އަހަރެންގެ ހާސްކަން ހުރީ ވާނެ އެންމެ މައްޗަކަށް ގޮސްފައި، އަހަރެން މިހުރީ ކިހާ ހާސްކަމެއްގައި ކަން ކަލެއަށް ހިޔާލަށް ވެސް ނުގެނެވޭނެ،" މިފަދަ އިބާރާތްތަކުންނެވެ.
އެ އިބާރާތްތަކާ އެކު ސާވޭގެ ބައިވެރިން ރޭޓް ކުރި އިރު، ކޮންފަރެންސަކީ ހާސްކަމެއްގެ ގޮތުގައި ސިފަކުރި މީހާ ރޭޓްކުރީ ކުޑަކޮށް ހިތްހަމަޖެހޭ ގާބިލުކަން ކުޑަ މީހެއްގެ ގޮތުގަ އެވެ. އެމީހުން ބުނި ގޮތުގައި ކޮންފަރެންސާ ހެދި މަސައްކަތް ބުރަކަމަށް ބުނެ ޝަކުވާ ކުރި މީހާއަށް އެހީތެރިވާކަށް ވެސް އެމީހުން ބޭނުމެއް ނުވެ އެވެ.
"އެކުގައި މަސައްކަތްކުރާ މީހުންގެ ކުރިމަތީގައި މަގުބޫލުމީހަކަށްވާނެ ކަމަށް ހީކޮށް މިކަންތައް ކުރާ މީހުން އަމިއްލަ ނަފުސަށް އެދެނީ ގެއްލުން، " ޖެސިކާ ވިދާޅުވެފައި ވެ އެވެ.
ޖެސިކާއާއި އޭނާގެ ބައިވެރިން، ދިރާސާގައި އިތުރު 218 މީހަކު ބައިވެރިކޮށްގެން، ހާސްކަމާ މެދު ފަހުރުވެރިވާ ހަގީގީ މީހުންނާ މެދު ދެކޭ ގޮތް ބެލުމުގެ ސާވޭ އެއް ވެސް ކުރި އެވެ. އެ ސާވޭއިން އެނގުނު ގޮތުގައި އެފަދަ މީހުންނާ އެކުގައި މަސަްއްކަތްކުރާ މީހުންނަށް ވެސް ހާސްކަމާއި ބާން އައުޓް ކުރިމަތިވެ އެވެ.
ޖެސިކާ ވިދާޅުވެފައިވާ ގޮތުގައި ހާސްކަން ބޮޑުވުމަކީ ފަޚުރެއް ކަމަށް ބެލުމުގެ ސަބަބުން، ދާއިމީ ގޮތެއްގައި ހާސްކަން ބޮޑުވުމަކީ މަސައްކަތުގެ ސަގާފަތުގެ ތެރެއިން ޔަގީނުން ވެސް އަންނާނެ ކަމެއް ކަމަށް ދުށުމާއި އެއީ މަސައްކަތުގެ ބައެއް ގެ ގޮތުގައި ތަސައްވުރު ކުރެވެން ފަށަ އެވެ.
"ތަކުރާރުކޮށް ހާސްކަމުގެ ވާހަކަ ދައްކައި ފޮނިކަނޑަންޏާ، ހާސްވުމަކީ ރަނގަޅުކަމެއް ކަމަށް ދެކެވެން ފަށައި، އަދި އެކަން އެއާ ޖެހިގެން ހުންނަ މުވައްޒަފާ ހަމައަށް ފެތުރޭ، އޭގެ ސަބަބުން ބާންއައުޓް އިތުރުވެ، މަސައްކަތާ ދުރުވާ މީހުން ގިނަވޭ،" ޖެސިކާ ވިދާޅުވިކަމަށް ސައިންސް ޑެއިލީގެ ލިއުމުގައި ވެ އެވެ.
Ads by STO
