ގަވައިދާ ހިލާފަށް، ފުޅާ ދާއިރާގައި ރީޓެއިލް ވިޔަފާރި ކުރި ބިދޭސީއަކާ އޭނާގެ މުވައްޒަފުން އަތުލައިގަނެފި
މާލޭގައި ގަވާއިދާ ހިލާފަށް ފުޅާ ދާއިރާގައި ރީޓެއިލް ވިޔާފަރީ ކުރި ބިދޭސީއަކާ އޭނާގެ މުވައްޒަފުންތަކެއް އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
ގަވާއިދާ ހިލާފަށް އުޅޭ ބިދޭސީން އަތުލައިގަންނަން ބޮޑު އޮޕަރޭޝަނެއް ކުރިއަށް އެބަދެ އެވެ. އިމިގްރޭޝަންގެ ރަސްމީ އެކައުންޓުން 'އެކްސް' ގައި ކުރި ޕޯސްޓެއްގައި ބުނީ، ކުދި ކުދި ރީޓެއިލް ފިހާރަތައް ފުޅާ ދާއިރާއެއްގައި ހިންގަމުންދާ ބިދޭސީއެއްގެ މައުލޫމާތު ލިބިގެން ރޭ 23:30 އާއި 00:30 ދެމެދު ހާއްސަ އޮޕަރޭޝަނެއް ހިންގާފައިވާ ކަމަށެވެ.
އެ އޮޕަރޭޝަންގައި އެ ބިދޭސީ މީހާ އާއި އެކު އެ ސައިޓުގައި ގަވާއިދާ ހިލާފަށް މަސައްކަތް ކުރަމުންދިޔަ ބިދޭސީ 03 ފިރިހެނަކާއި، 01 އަންހެނަކު ވެސް ވަނީ ހައްޔަރުކޮށްފަ އެވެ.
ރޭ ހިންގި އިތުރު އޮޕަރޭޝަނެއްގައި ހުޅުމާލޭގެ ދެ ތަނެއް ބަލައި ފާސްކޮށް، ގަވާއިދާ ހިލާފަށް ވިޔަފާރި ކުރަމުންދިއަ 04 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވެ އެވެ.
ދިވެހިރާއްޖޭގެ އިމިގްރޭޝަން ގާނޫނުގެ 30 ވަނަ މާއްދާގެ ދަށުށް ރާއްޖޭގައި ބިދޭސީންނާއެކު މުއާމަލާތްތައް ހިންގާ ދިވެހިން, މަސައްކަތްކުރުމުގެ ހުއްދަނެތް ބިދޭސީއަކު ލައްވާ ރާއްޖޭގައި އެއްވެސް މަސައްކަތެއް ކުރުވުމަކީ ކުށެެކެވެ.
އަދި އެފަދަ ފަރާތްތައް އެ ގާނޫނުގެ 33 ވަނަ މާއްދާގެ (ށ) ގެ ދަށުން، 50,000 ރުފިޔާއަށްވުރެ ބޮޑުނޫން އަދަދަކުން ޖޫރިމަނާކޮށް އެމީހެއްގެ ޕާސްޕޯޓު ވަކިމުއްދަތަކަށް ހިފެހެއްޓުމުގެ އިހްތިޔާރު، ކޮންޓްރޯލާ އޮފް އިމިގްރޭޝަނަށް ލިބިގެންވެ އެވެ.
