ބޭހުގެ އަގު ހެޔޮކުރަން، ބަލްކްކޮށް، ފެންވަރު ރަނގަޅު ޔޫރަޕްކޮލިޓީ ބޭސް ގެންނަނީ
ޔޫރަޕް ކޮލިޓީގެ ބޭސް ރާއްޖޭގައި ބޭނުންކުރެވޭ ގޮތަށް ސިޔާސަތުތަކެއ އެކުލަވާލައި އަމަަލުކުރަން ފަށާފައިވާ ސަރުކާރުން މިއަދު ހާމަކޮށްފި އެވެ.
އެކަން ހާމަކުރީ ސަރުކާރު ކުންފުނި އެސްޓީއޯ އަދި އާސަންދަ ގުޅިގެން ނެރުނު ނޫސްބަޔާނެއްގަ އެވެ. ފެންވަރު ރަނގަޅު ބޭސް ރައްޔިތުންނަށް ކަށަވަރުކޮށް ދިނުމަކީ ރައީސް ޑރ މުހައްމަދު މުއިއްޒުގެ ރިޔާސީ ވައުދުފުޅެކެވެ.
ސަރުކާރުން ބުނީ، ރައީސްގެ ވައުދުުފުޅު ފުއްދުމުގެ ގޮތުން ޔޫއެންޑީޕީ އާއި ގުޅިގެން އެސްޓީއޯ މެދުވެރިކޮށް ރައްޔިތުންނަށް ބޭނުންވާ ފެންވަރު ރަނގަޅު އަދި ރައްކާތެރި ބޭސް، ޕޫލް ޕްރޮކިއުމެންޓެއްގެ ތެރެއިން، ބަލްކް ޕްރޮކިޔުކޮށް ރާއްޖެ ގެނައުމަށް ފަށާފައިވާ ޕްރޮޖެކްޓުގެ ދަށުން އަސާސީ ހުރިހާ ބޭހެއް ރާއްޖެއިން ލިބެން ހުންނާނެކަން ކަށަވަރު ކުރެވޭނެ ކަމަށެވެ.
"މި ޕްރޮޖެކްޓުގެ ދަށުން ގެނެވޭ ބޭސްތަކަކީ ސީދާ ބޭސް އުފައްދާ ކުންފުނިން ގަނެ، ބޭސް އުފެއްދުމާ ހަމައިން ފެށިގެން ބަލި މީހާއާއި ހަމައަށް ރައްކާތެރިކަން ކަށަވަރު ކުރެވިފައިވާ ބޭސްތަކެވެ" ބަޔާނުގައި ބުންޏެވެ.
އެ ސިޔާސަތުގެ ދަށުން ރާއްޖެ އެތެރެކުރަން ހުއްދަދީފައިވަނީ އަދި ކުރިއަށް އޮތް ތަނުގައި ހުއްދަދޭނީވެސް ޑަބްލިއުއެޗްއޯ ލިސްޓެޑް ނުވަތަ ސްޓްރިންޖެންޓް ރެގިއުލޭޓަރި އޮތޯރިޓީއެއްގައި ރަޖިސްޓްރީ ކޮށްފައިވުމާއެކު، ޔޫއެންޑީޕީ އާއި މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ ކޮލިޓީ މިންގަނޑުތަކަށް ފާސްވެފައިވާ ޕްރޮޑަކްޓްތަކެވެ.
"މީގެ ނަތީއްޖާއެއްގެ ގޮތުން ރާއްޖޭގައި މި ސިޔާސަތުގެ ތެރެއިން ގެނެވި، ބޭނުންކުރެވޭނީ ޔޫރަޕްގެ ގައުމުތަކުގައި ބޭނުންކުރަމަށް އެ ގައުމުތަކުގެ ސިއްހީ އިދާރާތަކުން ހުއްދަދީފައިވާ ބޭސް އެކަންޏެވެ"
ސަރުކާރުން ބުނީ، ދެ މަރުހަލާއަކަށް ބަހާލައިގެން އެކަން ތަންފީޒުކުރެވޭއިރު މިއަދުން ފެށިގެން އެސްޓީއޯ މެދުވެރިކޮށް ހޯލްސޭލް އަދި ރީޓެއިލްކޮށް، ފުރަތަމަ ތައާރަފުކުރެވޭ 7 ބޭސް ލިބޭނެ ކަމަށެވެ. އަދި އާސަންދަ ނިޒާމު ހިމެނޭޙެން ގުޅުންހުރި ހުރިހާ ނިޒާމުތަކަށް ގެންނަން ޖެހޭ ބަދަލުތައް ފެށޭނެ ކަމަށެވެ.
އެ ސިޔާސަތުތައް ތަންފީޒުކުރަން ފެށުމާއެކު ދެމެހެއްޓެނިވި ގޮތެއްގައި އެންމެ ފެންވަރު ރަނގަޅު ބޭސް ރައްޔިތުންނަށް ލިބެން ފަށާނެ ކަމަށާއި، މިހާރެކޭ އެއްގޮތަށް އެ ބޭސްތަކަށް އާސަންދައިން ފުލްކަވަރޭޖް ލިބޭނެ ކަމަށެވެ.
"އާސަންދަ ނިޒާމުގެ ތެރޭގައި ހުރި ބޮޑެތި ލީކޭޖްތައް ހުއްޓުވި، ބޭހުގެ އަގު ކޮންޓްރޯލް ކުރުމަށް މަގުފަހިވާނެއެވެ. މީގެ ނަތީއްޖާއެއްގެ ގޮތުން އެންމެ ފެންވަރު ރަނގަޅު ބޭސް ރައްޔިތުންނަށް ފޯރުކޮށްދެވުމާއެކު، އާސަންދައިގެ ތެރެއިން ބޭހަށް ކުރެވޭ ބޮޑު ހަރަދު ވަރަށް ބޮޑުތަނުން ސަލާމަތްކުރެވި ސިއްހީ ނިޒާމު ހަރުދަނާކުރުމުގެ ފުރުސަތު ތަނަވަސްވާނެއެވެ" ބަޔާނުގައި ބުންޏެވެ.
