އާންމުން ބައިވެރިވެ ސުވާލު ކުރެވޭ ގޮތަށް ބީއެމްއެލްގެ ވެރިން މަޖިލީހަށް ހާޒިރު ކޮށްދެން އެދިއްޖެ
އާންމުންނަށް ބައިވެރިވެ ސުވާލު ކުރެވޭ ގޮތަށް ބޭންކް އޮފް މޯލްޑިވްސްގެ ވެރިން މަޖިލީހަށް ހާޒިރުކޮށް ޖަވާބުދާރީ ކުރުމުގެ އިންތިޒާމު ހަމަޖައްސައިދިނުމަށް މައްޗަންގޯޅި ދެކުނު ދާއިރާގެ މެންބަރު އަހްމަދު ހައިތަމް އެދިވަޑައިގަންފިއެވެ.
ރައްޔިތުންގެ ތެރެއިން ގިނަ ބައެއްގެ އެކައުންޓުތަކުން ފައިސާ ކެނޑުމާއި ބައެއް ބޭންކު މުއާމަލާތްތަކަށް އެއް ފަަހަރަށް ވުރެ ގިނަ ފަހަރު ފައިސާ ކެނޑުމާއި އެފަދަ ކަންކަމުގައި ބޭންކުން ޖަވާބުދާރީވާން ޖެހޭ ވަރަށް ނުވުމުގެ މައްސަލަތަކުގެ ޝަކުވާ ގިނަ ވެފައިވާކަމަށް ވިދާޅުވެ ހައިތަމް ވަނީ ރައްޔިތުން މަޖިލީހުގެ ރައީސް މުހައްމަދު ނަޝީދަށް ސިޓީއެއް ފޮނުއްވާފައެެވެ.
ހައިތަމްގެ ސިޓީގައި ބުނެފައިވަނީ ރައްޔިތުން މަޖިލީހުގައި ސަރުކާރު ހިއްސާވާ ކުންފުނިތައް ޖަވާބުދާރީ ކުރުމުގެ މެންޑޭޓް އޮންނަ އެސްއޯއީ ކޮމިޓީއަށް ބީއެމްއެލްގެ ވެރިން ހާޒިރުކޮށްދޭން އެދިވަޑައިގަންނަވާ ކަމަށެވެ. އަދި އެ ބައްދަލުވުމުގައި ރައްްޔިތުންނަށްވެސް ބައިވެރިވެ ބީއެމްއެލްގެ ވެރިންނަށް ސުވާލު ކުރެވޭނެ އިންތިޒާމް ހަަމަޖައްސައިދިނުމަށްވެސް ހައިތަމް ވަނީ އެދިވަޑައިގަންފައެވެ.
ރައްޔިތުންގެ މި ޝަކުވާތަކާއި ގުޅިގެން ބީއެމްއެލް އިން މިއަދު ވަނީ ބަޔާނެއްވެސް ނެރެފައެވެ.
ބީއެމްއެލް އިން ނެރުނު ބަޔާނެއްގައި ބުނެފައިވަނީ ކަސްޓަމަރުންގެ އެކައުންޓުތަކުން ކަނޑާފައި އެވަނީ ކުރިން އެފަރާތްތަކުން ކޮށްފައިވާ މުއާމަލާތްތަކުގެ ފައިސާ ކަމަށާއި އިންޓަނެޓް ބޭންކިންގ މެދުވެރިކޮށް އެމުޢާމަލާތަކަށް "ކްލިކް" ކޮށްލުމުން، މުޢާމަލާތް ކޮށްފައިވާ ތާރީޚު އެނގެން ހުންނާނެ ކަމަށެވެ.
ކަސްޓަމަރުންގެ އެކައުންޓުތަކުން މިފަދައިން ފައިސާ ކެނޑިގެން ދިޔުމުން ކުރިމަތިވި ކަންބޮޑުވުންތަކަށް ބީއެމްއެލް އިން ވަނީ މާފަށް ވެސް އެދިފައެވެ.
