ދައުލަތުގެ ބިލުތައް އެންމެނަށް ފެންނަ ގޮތަށް ހަދާނަން: ރައީސް
ދައުލަތުގެ ބިލުތައް އެންމެނަށް ފެންނަ ގޮތަށް ހަދާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
މިނިވަން ދުވަހުގެ މުނާސަބަތުގައި މިރޭ ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ރަނގަޅު ގަވަނެންސް ނިޒާމެއް ރާއްޖޭގައި ގާއިމުކުރުމަށް ކޮރަޕްޝަން ނައްތާލުމަކީ މުހިންމު ކަމެއް ކަަމަށެވެ. ކޮރަޕްޝަން ނައްތާލުމަށް ދުވަހަކު ރާއްޖޭގައި ނުކުރާ ފެންވަރަށް މި ސަރުކާރުން މަސައްކަތް ކުރާނެ ކަމަށް ރައީސް ވިދާޅުވި އެވެ.
ރައީސް ވިދާޅުވެފައި ވަނީ އެމަނިކުފާނު ހިންގާނީ ދެފުށްފެންނަ ޓްރާންސްޕޭރެންޓް ސަރުކާރެއް ކަމަށެވެ. އެގޮތުން އަލަށް ކުރަން ނިންމާފައިވާ އެއްކަމަކީ ފިނޭންސް މިނިސްޓްރީން އެކި ފަރާތްތަކަށް ފައިސާ ދޭ ގޮތް ފެންނާނެ ނިޒާމެއް ގާއިމުކުރުން ކަމަށް އެމަނިކުފާނު ވިދާޅުވި އެވެ. ރައީސް ވިދާޅުވި ގޮތުގައި ފިނޭންސް މިނިސްޓްރީން ނުގަވާއިދުން މީހުންނަށް ފައިސާ ދޭ ވާހަކަ އިވިވަޑައިގަންނަވާ ކަމުގަ އެވެ. އެންމެނަށް ފެންނަ ގޮތަކަށް ނިޒާމު ބަދަލު ކުރެވުމުން އެކަން ކުރުން ނިމުމަށް އަންނާނެކަން ރައީސް ފާހަގަކުރެއްވި އެވެ.
"ފިނޭންސް މިނިސްޓްރީގައި ޕެންޑްވެފައި ހުރި ބިލުތައް. ކޮންއިރަކު ހުށަހެޅި، ކާކު ހުށަހެޅި، ކިހާވަރެއްގެ ބިލެއްކަން އެންމެނަށް އޯޕަންކޮށް ފެންނަން ހުންނާނެ ގޮތް ހަދައިދޭނަން. އޭރުން މިތާ އޮތް ބިލު ނަގާ މައްޗަށް ލާކަށް ނުކެރޭނެ. ތަރުތީބުން ދާނީ،" ރައީސް ވިދާޅުވި އެވެ.
ރައީސް ވިދާޅުވީ ތަރުތީބުން ގެންދަން ފުރުސަތު ހުޅުވާލީމާ ވަކި މީހަކަށް ފުރުސަތު ފަހިވާ ގޮތަށް ކަންތައް ކޮށްދޭ ކަަމަށް ބުނެ އެއްވެސް މީހަަކަށް އިނގިލި ދިއްނުކުރެވޭނެ ކަަމަށެވެ. އެ ނިޒާމު ގާއިމުކުރުމުގެ މަސައްކަތް މާލީ ވުޒާރާގެ ވަޒީރާ މިހާރު ހަވާލުކުރައްވާފައިވާ ކަމަށް ރައީސް ވިދާޅުވި އެވެ. އެމަނިކުފާނު ވިދާޅުވެފައި ވަނީ އެ ނިޒާމުން ކޮންމެ މަޝްރޫއެއް ވަކިން އެނގޭނެ ކަމަށާއި އެ މަޝްރޫއަކުން ފައިސާ ނުދެވިހުރި ބިލުތަކާއި ބިލުތަކަށް ވީ ދުވަސް އެނގޭނެ ކަމަށެވެ. އަދި ފައިސާ ނުދީ ލަސްކުރާ ނަމަ، ލަސްކުރަނީ ކޮން ކަމަކަށް ފައިސާ ދޭންކަން ވެސް އެނގޭނެ ކަމަށެވެ. އެކި ކަންކަމުގައި ފައިސާ ނުދީ ލަސްކުރަން ޖެހޭ ފަހަރު އަންނަކަން ރައީސްގެ ވާހަކަފުޅުގައި ފާހަގަކުރެއްވި އެވެ.
"އެކި މިނިސްޓްރީތަކުން ހިންގާ މަޝްރޫއުތަކަށް ބިލު ފިނޭންސަށް ދިޔައީމާ ކޮންޓްރެކްޓަރަށް ވެސް އެނގޭނެ މިހާރު ގޮއްސިކަން. ކޮންމެހެން ނުޖެހޭނެ މުވައްޒަފަކަށް ގުޅާ އެހެން މަގަކުން މިކަން ކުރަން މަސައްކަތް ކުރާކަށް. އެކަން ނިމުމަކަށް ގެންނާނަން،" ރައީސް ވިދާޅުވި އެވެ.
ސޯޝަލް ސެންޓަރުގައި ކުރިއަށްދިޔަ ޖަލްސާގައި ރައީސް ވިދާޅުވި ގޮތުގައި ހަގީގީ މާނައިގައި ކޮރަޕްޝަން ނައްތާލުމަށް މަސައްކަތް ކުރައްވާނެ ކަމުގަ އެވެ. އިގުތިސޯދު ހަރުދަނާ ކުރުމަށާއި ރާއްޖޭގައި ހަރުދަނާ ގަވަނަންސް ނިޒާމެއް ގާއިމުކުރުމަށް އެއީ ކޮންމެހެން ކުރަން ޖެހޭ ކަމެއް ކަމުގައި އެމަނިކުފާނުގެ ވާހަކަފުޅުގައި ފާހަގަކުރެއްވި އެވެ.
