ބިރު ދައްކައި ފޭރުނު މައްސަލައެއްގައި އަންހެނަކު ހައްޔަރުކޮށްފި
ހުސްވި ހަފްތާގެ ބުދަ ދުވަހު މާލޭގެ ގެއެއްގެ ތެރެއަށް މީހަކު ވައްދައި ފޭރުނު މައްސަލައަކާއި ގުޅިގެން އުމުރުން 43 އަހަރުގެ އަންހެނަކު ހައްޔަރުކޮށްފި އެވެ.
މިމައްސަލައިގައި އިއްޔެ ފުލުހުން ވަނީ 26 އަހަރާއި 35 އަހަރުގެ ދެ ފިރިހެނުންވެސް ހައްޔަރުކޮށްފަ އެވެ. އެމީހުން ހައްޔަރު ކުރުމަށްފަހު މި ކުށުގައި ޝާމިލުވާ އަންހެން މީހާ ހޯދުމުގެ މަސައްކަތް ފުލުހުން ފެށި އެވެ. އެ ހިދުމަތުން މިއަދު ބުނީ ހޯދަމުން ދިޔަ ދިވެހި އަންހެން މީހާ ހައްޔަރުކޮށްފައިވާ ކަމަށެވެ.
އަންހެން މީހާގެ ބަންދާއިމެދު ގޮތެއް ނިންމަން ކޯޓަށް ގެންދިޔައިރު އޭނާގެ މައްސަލަ ނިމެންދެން ބަންދު ކުރަން ކޯޓުން ވަނީ އަމުރުކޮށްފަ އެވެ.
ކުރިން ހައްޔަރު ކުރި ދެ މީހުންގެ ތެރެއިން އެކެއްގެ ބަންދަށް ކޯޓުން ދިނީ 30 ދުވަހެވެ. އަދި އަނެއް މީހާގެ ބަންދަށް ދިނީ 60 ދުވަހެވެ.
މި މައްސަލައިގައި މާލޭގެ ގެއެއްގެ ތެރެއަށް އެމީހާ ވައްދައި ބިރު ދައްކައިގެން ކޭޝް ކާޑުގެ ޕިން އަތުލި ކަމަށްވެ އެވެ. އަދި ކޭޝް ކާޑުން ގިނަ ފައިސާތަކެއް ފޭރުނު ކަމަށް ފުލުހުން ބުންޏެވެ.
މިފަހުން މާލޭ ސަރަހައްދުގައި ބިރު ދެއްކުމާއި ފޭރުމުގެ މައްސަލަތައް ގިނަ އަދަދަކަށް އަންނަނީ ފެންމަތިވަމުންނެވެ. މިފަދަ މައްސަލަތަކަށް ސަމާލުވުމަށް ފުލުހުން ދަނީ ތަކުރާރުކޮށް އިލްތިމާސް ކުރަމުންނެވެ.
އެގޮތުން ސޯޝަލް މީޑިއާ މެދުވެރިކޮށް ނުދަންނަ މީހުންނާއި ވާހަކަ ނުދެއްކުމާއި, ނުދަންނަ މީހުން ބުނެގެން ތަންތަނަށް ނުދިއުމަށް ފުލުހުން އިލްތިމާސް ކުރެ އެވެ. މީގެ އިތުރުން ސޯޝަލް މީޑިއާ މެދުވެރިކޮށް މީހަކު ފައިސާ ފޮނުވަން ބުނެފިނަމަ އޭގެ ސައްހަކަން ކަށަވަރު ކުރުމަށްފަހު ނޫނީ ފައިސާ ނުފޮނުވަން ވަނީ އިލްތިމާސް ކޮށްފަ އެވެ.
Ads by STO
