ފަނޑިޔާރުން ކުރާ ކަމެއް ނޯވޭ، އިންޝުއަރެންސް ބޮޑުކުރަން ދެކޮޅު: ނާޒިމް
ރާއްޖޭގައި މަސައްކަތްކުރާ ފަނޑިޔާރުންގެ މަސައްކަތުގެ ދުވެލި އެންމެ ރަނގަޅަށް ނުފެންނަ ކަމަށާއި ފަނޑިޔާރުންގެ އިންޝުއަރެންސް ބޮޑު ކުރަން ނުފެންނަ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް، އެ މަޖިލީހުގެ މާލިއްޔަތު ކޮމިޓީގައި މިއަދު ވިދާޅުވެއްޖެ އެވެ.
ފަނޑިޔާރުންގެ މެޑިކަލް އިންޝުއަރެންސް ބޮޑުކުރުމަށް ރައްޔިތުންގެ މަޖިލީހަށް ހުށަހަޅާފައިވާ މައްސަލާގައި ވާހަކަ ދައްކަވަމުން ނާޒިމް ވިދާޅުވީ ފަނޑިޔާރުންގެ އަތުގައި އެތައް މައްސަލައެއް އޮވެފައި، މައްސަލަ ނުވެސް ނިންމައި އަވަހަށް ރިޓަޔާވާ ކަން ވެސް ފާހަގަ ކުރެވޭ ކަމަށެވެ.
ރިޓަޔާ ވުމަށް ފަހުގައި ވަކީލެއްގެ ގޮތުގައި މަސައްކަތްކުރާ ފަނޑިޔާރުން ވެސް މަދު ނޫން ކަމަށް ނާޒިމް ވިދާޅުވި އެވެ. އޭގައި "އެއްވެސް ހަމައެއް ލަމައެއް ނެތް" ކަމަށް ނާޒިމް ވިދާޅުވި އެވެ.
"ސިއްހަތު ސަލާމަތުން ތިބޭ މެދު އުމުރުގެ ފަނޑިޔާރުން ރިޓަޔާކޮށްފާނެ، ރިޓަޔާކޮށްފައި ހަމަ ޕެކޭޖު ނަގައިގެން ދާންވީ، އެހެން ވެގެން ނުވާނެ،" ސަތާރަ އަދި އަށާރަވަނަ މަޖިލީހާއި މި މަޖިލީހުގައި ވެސް ދިއްގަރު ދާއިރާ ތަމްސީލްކުރައްވާ މެންބަރު ނާޒިމް ވިދާޅުވި އެވެ.
ކޮންމެ ގާޒީއެއްގެ އަތުގައި 100 އާއި 500 އާ ދެމެދުގެ މައްސަލަތައް ނުނިމި އޮންނަ ކަމަށް ނާޒިމް ވިދާޅުވި އެވެ. ސިވިލް ކޯޓުގައި އަޑުއެހުމެއް ނުބޭއްވޭތާ ވެސް ދެ އަހަރަށް ވުރެ ގިނަ ދުވަސްވީ މައްސަލަތައް ވެސް އެބަ އޮތް ކަމަށް އޭނާ ވިދާޅުވި އެވެ.
"ގައިމު ކުރާ ކަމެއް އޮންނަން ވާނެތާ، މިހާރު ވެސް 62،000 ރުފިޔާގެ މުސާރައެއް ނަގާއިރު،" ނާޒިމް ވިދާޅުވި އެވެ.
ފަނޑިޔާރުންނަށް މަސައްކަތް ނުކުރެވޭއިރު ފަނޑިޔާރުންގެ ހެލްތު އިންޝުއަރެންސް ޕެކޭޖު ދައުލަތުގެ ހަރަދުގައި ބޮޑު ކުރުމަކީ ރައްޔިތުންގެ ޓެކްސް ފައިސާ ބޭކާރު ވުން ގޮތުގައި އޭނާ ސިފަކުރެއްވި އެވެ.
