އެކްސިޑެންޓްވުމުން ފިލި ޑްރައިވަރު ހައްޔަރުކޮށްފި
މިއަދު ހުޅުމާލެ ދެވަނަ ފިޔަވަހީގައި ނުރައްކާތެރި އެކްސިޑެންޓެއް ހިނގުމުން، އެ އެކްސިޑެންޓުވި ކާރުގެ ޑްރައިވަރު ފުލުހުން ހައްޔަރުކޮށްފި އެވެ.
ފުލުހުން ބުނި ގޮތުގައި އެއީ 25 އަހަރުގެ ދިވެހި ފިރިހެނެކެވެ. މިރޭގެ ވަގުތެއްގައި އޭނާ ހައްޔަރުކުރީ ކޯޓު އަމުރެއްގެ ދަށުންނެވެ.
ހުޅުމާލެ ދެވަނަ ފިޔަވަހީގައި ހުންނަ ވިނަރެސް ފްލެޓް ކައިރީގައި ހިނގި މި ނުރައްކާތެރި އެކްސިޑެންޓުގެ ސީސީޓީވީ ފުޓޭޖުން މިހާރު ދަނީ ސޯޝަލް މީޑީއާގައި ދައުރުކުރުވަމުންނެވެ.
އެ ވީޑިއޯ އިން ސައިކަލެއްގައި ދުއްވާފައި އަންނަ މީހަކު މަގުގެ އެއް ފަަރާތުގައި މަޑުކޮށްލާ މަންޒަރު ފެނެ އެވެ. ކުޑަ ވަގުތުކޮޅެއް ފަހުން ރަތް ކުލައިގެ ކާރެއް ބާރު ސްޕީޑުގައި އެ މީހާއާ ދިމާލަށް ދުއްވާފައި އަންނަ މަންޒަރު ފެނެ އެވެ. ކޮންޓްރޯލުން ނައްޓާލާފައިވާ އެ ކާރުން ޖެހުމާ އެކު، އެ މީހާ ވިއްސައިގެންދެ އެވެ.
އޭގެ ފަހުގައި ކާރުގައި ތިބި މީހުން ކާރުން ނުކުމެ، އެ ތަން ދޫކޮށްދާ މަންޒަރު ފެނެ އެވެ.
އަނިޔާވި މީހާއަށް އައިޖީއެމްއެޗްގައި ދަނީ ފަރުވާ ދެމުންނެވެ. އޭނާގެ ހާލު ރަނގަޅު ވަމުން އަންނަ ހޮސްޕިޓަލުން ބުންޏެވެ.
