އާރުޓީއެލްގެ ފުވައްމުލައް-ވާދޫ ރޫޓަށް ފަރެސްމާތޮޑާ އިތުރުކޮށްފި
އެމްޓީސީސީން ދެމުން ގެންދާ "އާރުޓީއެލް" ލޯންޗު ފެރީ ހިދުމަތުގައި ހިމެނޭ ފުވައްމުލައް ސިޓީން ހުވަދު އަތޮޅުގެ ރަށްތަކަށް ދަތުރުކުރާ ރޫޓުތަކުގެ ތެރެއިން ވާދޫ ރޫޓަށް އެ އަތޮޅު ފަރެސްމާތޮޑާ އިތުރުކޮށްފި އެވެ.
އެމްޓީސީސީން ބުނީ ފުވައްމުލައް ސިޓީން ގދ. ވާދޫއަށް ދަތުރުކުރާ ރޫޓަށް އާ ސްޓޮޕެއް އިތުރުކޮށް ފަރެސްމާތޮޑާއަށް ހުއްޓާ ގޮތަށް މާދަމާއިން ފެށިގެން އަމަލުކުރަމުންދާނެ ކަމަށެވެ.
"މިއީ ކަސްޓަމަރުންގެ ފީޑްބެކަށް ބެލުމަށް ފަހު، މި ޒޯނުގެ ހިދުމަތް އިތުރަށް ރަނގަޅު ކުރުމަށް ގެނެވިފައިވާ ބަދަލެއް ކަމުގައި ވެސް ފާހަގަ ކުރަން،" ކަސްޓަމަރުންގެ ސަމާލު ކަމަށް މި ކަން ގެނައުމަށް އެމްޓީސީސީން މިއަދު ނެރުނު ޕޯސްޓެއްގައި ލިޔެފައިވެ އެވެ.
މީގެ ކުރިން އެ ރޫޓުން ދަތުރުކުރަނީ ފުވައްމުލައް ސިޓީން ވާދޫއަށް އެކަންޏެވެ. މި ގެނެވުނު ބަދަލާއެކީ ދެން ފަރެސްމާތޮޑާއަށް ވެސް ފެރީ ދަތުރުކުރާނެ އެވެ.
ފުވައްމުލައް ސިޓީގައި ފަރެސްމާތޮޑާ މީހުން ގިނަ އެވެ. އަސާސީ ތައުލީމާއި މަތީ ތައުލީމު ހާސިލުކުރުމަށް ފުވައްމުލައް ސިޓީގައި އުޅޭ އެހެން ރަށްރަށުގެ ދަރިވަރުންގެ ތެރޭގައި ވެސް ފަރެސްމާތޮޑާ ޒުވާނުން ގިނަ އެވެ.
