އަޤްޞާ މިސްކިތަށް އިޒްރޭލު ބަޔަކު ވަދެ ހަމަނުޖެހުން ހިންގުން ރާއްޖޭން ކުށްވެރިކޮށްފި
މަސްޖިދުލްއަޤްޞާއަށް އިޒްރޭލުގެ އޮފިޝަލުން ވަދެ ހިންގި ހަމަނުޖެހުން ދިވެހި ސަރުކާރުން ކުށްވެރިކޮށް ބަޔާނެއް ނެރެފި އެވެ.
ދިވެހި ސަރުކާރުގެ އެ ބަޔާނުގައި ބުނީ އިޒްރޭލުގެ އޮފިޝަލުން، ދެ ވަޒީރުންނާއި ނެސެޓްގެ މެންބަރުން ހިމެނޭ ގޮތަށް، މަސްޖިދުލްއަލްއަޤްޞާއަށް ވަދެ ހިންގި ހަމަނުޖެހުން ސަރުކާރުން ކުށްވެރިކުރަނީ "އެންމެ ހަރުކަށި އިބާރާތުން" ކަމަށެވެ.
"މިއީ މުސްލިމް އުއްމަތުގެ އެންމެ މުޤައްދަސް އެއް ބިނާގެ ހުރުމަތް ކަނޑާލާ، މުސްލިމުންނާ ދެކޮޅަށް ހިންގި އަނިޔާވެރި އަމަލެއް ކަމުގައި ދެކެމެވެ." ބަޔާނުގައިވެ އެވެ.
އިޒްރޭލުން އަލްއަޤްޞާ މިސްކިތަށް ތަކުރާރުކޮށް ވަންނަމުން ދިއުމަކީ މެދު އިރުމަތީ ސަރަހައްދުގައި ސުލްހަ ގާއިމު ކުރުމަށް ކުރެވޭ މަސައްކަތްތަކަށް އެޅިގެންދާ ހުރަހެއް ކަމުގައި ދެކި، އެ ކަމާ މެދު ރާއްޖޭން ކަންބޮޑުވުން ފާޅުކުރާ ކަމަށް ބަޔާނުގައިވެ އެވެ.
ފަލަސްތީނުގައި ހިނގަމުންދާ ހަމަނުޖެހުންތަކަށް ސުލްހަވެރި އަދި ދެމެހެއްޓެނިވި ހައްލެއް ހޯދުމަށް ބައިނަލްއަޤްވާމީ މުޖުތަމައު ގުޅިގެން އަވަސް ފިޔަވަޅުތަކެއް އެޅުމަށް ދިވެހި ސަރުކާރުން ގޮވާލާ ގޮވާލުން މި ބަޔާނުގައި ވެސް ތަކުރާރުކޮށްފައިވެ އެވެ.
ދިވެހި ރައްޔިތުން ތިބީ ފަލަސްތީނުގެ ރައްޔިތުންނާ އެކުގައި ކަމަށާއި ދިވެހި ސަރުކާރުން އަބަދުވެސް އެ މައްސަލާގައި ގެންގުޅޭ ސްޓޭންޑް މި ބަޔާނުގައި ވެސް ފާހަގަކޮށްދީފައިވެ އެވެ.
