ސިހުން ގެނުވި ތުހުމަތެއް، ބުޅާ މަހުން ކާ އެއްޗެހި ހެދި މީހަކު ހޯދަނީ
މާލޭގައި އުޅޭ ބުޅާ މަރައި، އޭގެ މަހުން ހެދިކާ ތަކެތި ތައްޔާރުކުރާ ކަމުގެ ތުހުމަތު ބިދޭސީއަކަށް ކޮށްފި އެވެ.
ފީލައިން ވެލްފެއާ އޯގަނައިޒޭޝަން ކިޔާ އެންޖީއޯ އަކުން އެ ތުހުމަތުކުރަނީ ގަވާއިދާ ހިލާފަށް ރާއްޖޭގައި އުޅެމުންދާ ބަންގްލަދޭޝްގެ ފިރިހެނަކަށެވެ. އެ މީހާގެ ވޯކް ޕާމިޓްގެ ފޮޓޯއާ އެކު 'އެކްސް' ގައި ކުރި ޕޯސްޓެއްގައި އެ އެންޖީއޯ އިން ބުނީ، އެ މީހާ އުޅެމުން ދަނީ ގ. ރަނައުރާގެ އާގޭގައި ކަމަށެވެ.
"މީނާއަކީ ބުޅާ މަރައި، ކައްކާ އެ ތަކެތިން ކާތަކެތި ތައްޔާރުކުރާ މީހެއް" އެންޖީއޯއިން ބުންޏެވެ.
އެ ސަރަހައްދުގައި އުޅޭ ބައެއް މީހުން ބުނީ، އެ މީހާ ދިރިއުޅޭ ގެކައިރިން ބުޅާލުގެ މަހުގެ ބައިތައް ފެނިފައިވާ ކަމަށެވެ. އޭނާ އަކީ ބާގާ އާއި ސަބްމެރިން ވިއްކާ މީހެއް ކަމަށް އެ މީހުން ބުންޏެވެ.
އޭނާ ހޯދަން އިމިގްރޭޝަނުން ވަނީ މިރޭ އިއުލާންކޮށްފަ އެވެ.
އެ ތުހުމަތުގައި ހޯދަމުން ދަނީ ބަންގްލަދޭޝްގެ އަރަފާތު ހޮސެއިން (32އ) އެވެ. އެ މީހާ ހާޒިރުވާން ޖެހެނީ 5 ދުވަހުގެ ތެރޭގައި މ. ސްޓާ ކްލައުޑްގެ 10 ވަނަ ފްލޯގައި ހުންނަ އިމިގްރޭޝަންގެ އޮފީހަށެވެ.
އިމިގްރޭޝަން މީޑިއާ އޮފިޝަލް "ދެން އޮންލައިން" އަށް ވިދާޅުވީ އެ މީހާ ދިރިއުޅޭ ގެއަށް ދިޔައިރު އޭނާ ގޭގައި ނެތް ކަމަށެވެ. ފުލުހުން ބުނީ އެ މީހާއާ ގުޅޭ މައްސަލައެއް އެ އިދާރާއަށް ހުށަހެޅިފައިނުވާ ކަމަށެވެ.
