މާލެ ސަރަހައްދުގެ މައި ދެ މިސްކިތެއްގައި ބޭރުގެ އިމާމުން ހުކުރު ހުތުބާ ދެއްވަނީ
ދެން އަންނަ ހުކުރު ދުވަހު މާލޭގެ އިސްލާމީ މަރުކަޒާއި ހުޅުމާލޭގެ ރަޝީދު މިސްކިތުގައި ބޭރުގެ އިމާމެއް ހުކުރު ހުތުބާ ދެއްވާ ގޮތަށް އިސްލާމިކް މިނިސްޓްރީން ހަމަޖައްސައިފި އެވެ.
އެ މިނިސްޓްރީން ބުނި ގޮތުގައި އިސްލާމީ މަރުކަޒުގައި ހުތުބާ ދެއްވާނީ މައްކާގެ ޙަރަމްފުޅުގެ ފަތުވާ ކޮމިޓީގެ މެންބަރު، ޕްރޮފެސާ ޑރ. ހަމްދާން އައްސުލަމީ އެވެ. އޭނާ ހުތުބާ ދެއްވާނީ އަރަބި ބަހުންނެވެ.
ހުތުބާގެ ލައިވް ދިވެހި ތަރުޖަމާ ޓީވީތަކުން ގެނެސްދޭނެ ކަމަށް އިސްލާމިކް މިނިސްޓްރީން ބުންޏެވެ.
ހުޅުމާލެ ރަޝީދު މިސްކިތުގައި ހުތުބާ ދެއްވާނީ އޮސްޓްރޭލިއާ ނޭވީގެ އިމާމް މަޖްދީ އީސާ އެވެ. މަދީނާގެ އިސްލާމިކް ޔުނިވާސިޓީން ތައުލީމު ހާސިލްކުރެއްވި އެ އިމާމު ހުތުބާ ދެއްވާނީ އިނގިރޭސި ބަހުންނެވެ.
އިސްލާމީ މަރުކަޒުގައި ހުކުރު ހުތުބާ ދެއްވާ މައްކާ ހަރަމްފުޅުގެ އިމާމާއެކު މިނިސްޓަރު ޝަހީމް -- ފޮޓޯ: އިސްލާމިކް މިނިސްޓްރީ
އިސްލާމިކް މިނިސްޓްރީން ބުނި ގޮތުގައި އެ ދެ މިސްކިތުގައި އިމާމުވެ ހުކުރު ނަމާދު ކުރައްވާނީ ވެސް ހުތުބާ ދެއްވާ ބޭރުގެ އިމާމެވެ.
އިސްލާމީ މަރުކަޒުގައި އެންމެ ފުރަތަމަ އަރަބި ބަހުން ހުތުބާއެއް ދެއްވީ މަރުކަޒު ހުޅުވުމުގެ ރަސްމިއްޔާތުގަ އެވެ. އެއީ މިސްރުގެ ޝައިޚުލްއަޒްހަރު ޖާދަލްހައްގު އަލީ ޖާދަލްހައްގެވެ. މަރުކަޒު ހުޅުވުމުގެ ރަސްމިއްޔާތުގައި މައްކާގެ ހަރަމްފުޅުގެ އިމާމު ޝައިޚު ސުބައްޔިލް ވެސް ބައިވެރިވެވަޑައިގެންނެވި އެވެ.
މި އަހަރު ނޮވެމްބަރު 11 އަށް އިސްލާމީ މަރުކަޒު ހުޅުވިތާ 40 އަހަރު ފުރޭނެ އެވެ. އިސްލާމިކް މިނިސްޓްރީން ބުނީ އެ މުނާސަބަތަށް ހާއްސަ ހަފުލާއެއް ބޭއްވުމަށް ރައީސް ޑރ. މުހައްމަދު މުއިއްޒު އިރުޝާދު ދެއްވާފައިވާ ކަމަށެވެ.
އަޅުގަނޑަށް ހަމަ ރަނގަޅީ ދިވެހި އިމާމުން. ދިވެހި ތަރުޖަމާއާއެކީ.
ބޭރުމީހުން ލައްވާ ހުކުރު ކުރުން އިމާމު މީހާ ނިއްޖަހާ ބޮޑުބުދު މަތީ ގައި ނިއްކުރި ޖަހައި ނަމާދު ކުރުން އިސްލާމްދީނުގައި ސައްހަ ވާނެ ތޯ؟