ކޮވިޑްގައި ރައްޔިތަކަށް ތަކުލީފު ނުދީ ހިތިބޭސް ބުއީ އަޅުގަނޑުމެން: ފައްޔާޒު
ކޮވިޑް-19 ގެ ބަލިމަޑުކަމުގެ ހާލަތުގެ ދުވަސްވަރު ރައްޔިތަކަށް ތަކުލީފު ނުދީ "ހިތި ބޭސް ބުއީ" އޭރު ސަރުކާރުގެ ވެރިން ކަމަށް އެ ސަރުކާރުގައި އިކޮނޮމިކް މިނިސްޓަރުކަން ކުރެއްވި، މިހާރު އިދިކޮޅު އެމްޑީޕީގެ ޗެއާޕާސަން ފައްޔާޒު އިސްމާއީލް މިރޭ ވިދާޅުވެއްޖެ އެވެ.
އެމްޑީޕީގެ ގައުމީ މަޖިލީހުން މިރޭ ބޭއްވި އެ ޕާޓީގެ ގައުމީ މަޖިލީހުގެ ކުއްލި ބައްދަލުވުމުގައި ވާހަކަ ދައްކަވަމުން ފައްޔާޒު އިޝާރާތް ކުރެއްވި "ހިތި ބޭސް" އެއީ އިގުތިސޯދީ ގޮތުން ގައުމު އޮތް ހާލަތާ ގުޅުވައި މަޖިލީހުގެ ނައިބު ރައީސް އަހުމަދު ނާޒިމް "ހިތިބޭސް ބޯން ޖެހޭނަމަ ބޯން ޖެހޭ ކަން" ސަރުކާރުން އަންގަން ޖެހޭ ކަމަށް ވިދާޅުވެ ދެއްކެވި ވާހަކައިގައި ހިމެނޭ ލަފުޒެކެވެ.
ބީއެމްއެލުން ރުފިޔާ އެކައުންޓުން ބޭރުގެ މުއާމަލާތް ނުކުރެވޭ ގޮތަށް ނިންމި ނިންމުމާ އެކު، ދިވެހިންގެ ގިނަ ބަޔަކު ކަންބޮޑުވުން ފާޅުވަމުން ދަނިކޮށް އެމްއެމްއޭން އަންގައިގެން ބީއެމްއެލްގެ ނިންމުން ވަނީ ބަދަލުކޮށްފަ އެވެ. ސަރުކާރުގެ ވަޒީރުން ވިދާޅުވަނީ އެއީ ސަރުކާރާ މަޝްވަރާނުކޮށް ގެނައި ބަދަލެއް ކަމަށެވެ.
މި ކަމާ ގުޅިގެން އެމްޑީޕީގެ ގައުމީ މަޖިލީހުގެ މެންބަރުން އެއްކޮށް އެ ޕާޓީގެ ޖަގަހައިގައި ކުރިއަށް ގެންދިޔަ ބައްދަލުވުމުގައި ފައްޔާޒު ވިދާޅުވީ ޒަމާނުއްސުރެން ފެށިގެން ވެސް ދިވެހިރާއްޖޭގައި އޮތީ އެހާ ބާރަށް ހިނގަހިނގާ އޮތް އިގުތިސޯދެއް ނޫން ކަމަށެވެ. އެކަމަކު އަބަދުވެސް ރައްޔިތުންނަށް ބޭނުންވާ އަސާސީ ހިދުމަތްތައް ލިބެމުންދިޔަ ކަމަށް އޭނާ ވިދާޅުވި އެވެ.
"އެއީ އަބަދުވެސް ރާއްޖޭގެ ސަރުކާރުތަކުން އިގުތިސޯދު މެނޭޖު ކުރުމަށް ޓަކައި ހިތިބޭސް ބޯން ޖެހެންޏާ އެ ހިތިބޭހެއް ބޮނީ ސަރުކާރުތަކުން،" ފައްޔާޒު ވިދާޅުވި އެވެ.
އެމްޑީޕީގެ ސަރުކާރުގެ ދުވަސްވަރު ކޮވިޑް-19 ކުރިމަތިވުމުން ވެސް އިގުތިސޯދީ ތަދުމަޑުކަމުގައި ރައްޔިތުންނަށް ބޭނުންވާ އަސާސީ ހިދުމަތްތައް ފޯރުކޮށްދީ، އާމްދަނީ ތާށިވި ރައްޔިތުންނަށް ވެސް އެހީތެރިކަން ފޯރުކޮށްދެވުނީ ސަރުކާރުގެ ވެރީން "ހިތިބޭސް ބުއިމުން" ކަމަށް ފައްޔާޒު ވިދާޅުވި އެވެ.
"އަޅުގަނޑުމެން އެ ކަން ދަނެގެން، ރައްޔިތުންނަށް އެ ކަމުގެ ތަކުލީފެއް ނުޖައްސައި، އަޅުގަނޑުމެން ހިތިބޭސް ބޮއެގެން އެ ކަން ކަން ކުރީމަ، ރައްޔިތުންނަށް 21 ވަނަ ގަރުނުގައި ދޭން ޖެހޭ ކަމަށް ބެލެވޭ ހުރިހާ ހިދުމަތެއް ފޯރުކޮށްދެވުނީ،" ފައްޔާޒު ވިދާޅުވި އެވެ.
އޭރު ސަރުކާރުގެ މިނިސްޓަރުންގެ މުސާރަ ކުޑަކޮށް ރައްޔިތުންގެ މަޖިލީހުގެ މެންބަރުންގެ މުސާރަ ވެސް މަސްތަކަކަށް ކުޑަކުރަން ނިންމި އެވެ.
އެމްޑީޕީން ކޮވިޑް-19 ގެ ހާލަތުން އަރައިގަތުމަށް މި ސަރުކާރަށް ދޫކޮށްލީ ހިނގިހިނގާ އޮތް ރަނގަޅު އިގުތިސޯދެއް ކަމަށް ފައްޔާޒު ވިދާޅުވި އެވެ.
އެހެން ނަމަވެސް ރައީސް ޑރ. މުހައްމަދު މުއިއްޒުގެ ސަރުކާރުން ކަންކަން މެނޭޖުކުރަން ނޭނގުމުގެ ސަބަބުން އިގުތިސޯދު ދަށްވެ މިހާރު ފެންނަނީ އޭގެ ދަތިކަން ރައްޔިތުންނަށް ދޫކޮށްލާ ކަން ކަމަށް ފައްޔާޒު ވިދާޅުވި އެވެ.
"ރައްޔިތުން ގަންނަ ހަނޑޫހަކުރުފުށުން ސަބްސިޑީ ކަނޑާލަނީ، ރައްޔިތުން ނެޓްފިކްސް ބަލަން ހޭދަކުރާ ފައިސާ ކަނޑައިލަން ޖެހޭ ގޮތަށް،" ފައްޔާޒު ވިދާޅުވި އެވެ.
ޢަޅުގަނޑުމެން އާންމުރައްޔިތުންވެސް ހިތިބޭސްއަދިއަދަށް ވެސް ބޯންޖެހޭ.. އާންމުކޮށް ގަންނަންޖެހޭ އެއްޗެހި ފިހާރަތަކުން އަދިއަދަށްވެސް ވވ އަގުބޮޑު..އޭރުއްސުރެ އަދިވެސް އިންފޮލޭޝަން ދަނީ ދުވަހެއް ދުވަހަކަށް މައްޗަށް..މާގިނަވާހަކަ ނުދައްކާ..