ސަފީރުންނަށް އުދަނގޫކުރި ދެ މީހުން 3 ދުވަހަށް ބަންދުކޮށްފި
ދިވެހިރާއްޖޭގައި ތިއްބަވާ ބޭރު ގައުމުތަކުގެ ސަފީރުންނާ އެ ސަފީރުންގެ އާއިލާތަކަށް އުދަނގޫކުރި ކަމުގެ ތުހުމަތުގައި ހައްޔަރުކުރި ދެ އަންހެނުން ބަންދަށް ކްރިމިނަލް ކޯޓުން މިއަދު 3 ދުވަސް މިއަދު ޖަހައިފި އެވެ.
އެ މައްސަލާގައި ހައްޔަރުކޮށްފައިވަނީ ގދ. ރަތަފަންދޫ، ލިލީގެ ޑރ ޝަޒްރާ އިބްރާހިމް (36އ) އާއި މ. ބަޑިކުޅިމާގެ، އައިޝަތު ޝާދިޔާ(47އ) އެވެ.
އެ ދެ މީހުންނަކީ އިޒްރޭލާ ދެކޮޅަށް ރާއްޖޭގައި ހިންގާ ހަރަކާތްތަކުގައި ބައިވެރިވެ އުޅޭ ބައެކެވެ. ހައްޔަރުކުރި އަންހެނުން އަޑު އުފުލާފައިވަނީ އިނގިރޭސިވިލާތުގެ އެމްބަސީ އާއި ޖަރުމަން އެމްބަސީ އާއި ރާއްޖޭގައި ޔޫއެން އޮފީސް ދޮށުގަ އެވެ. އިނގިރޭސިވިލާތު އެމްބަސަޑަރު އަދި ސައުދީ އެމްބަސެޑަރު ހުންނަވާ ގެކޮޅު ކައިރީވެސް އެ މީހުން އިހުތިޖާޖުކޮށް އަޑުއުފުލި އެވެ.
އެ މީހުން ހައްޔަރުކުރުން ކުށްވެރިކޮށް އެ ދެ އަންހެނުން ދޫކޮށްލަން ގޮވާލައި އަދާލަތު ޕާޓީން ވަނީ ރޭ ބަޔާނެއްވެސް ނެރެފަ އެވެ. އެ ޕާޓީގެ ރައީސް ޝޭހް އިމްރާން އަބްދުﷲ ވިދާޅުވީ އެ ދެ އަންހެނުން ހައްޔަރުކުރުމަކީ ފަލަސްތީން ގަޒިއްޔާއާއި މެދު މި ސަރުކާރުގެ ފަރުވާލެއް ނެތްކަން ރަމްޒްކޮށްދޭ ނާތަހުޒީބު ފިނޑި އަމަލެއް ކަމަށެވެ.
އިސްލާމިކް މިނިސްޓަރު ޑރ ޝަހީމް އަލީ ސައިދު މިއަދު 'އެކްސް' ގައި ކުރެއްވި ޕޯސްޓެއްގައި ވިދާޅުވީ ސަފީރުންގެ އާއިލާތަކަށް ގޯނާ ކުރުމަކީ ފަލަސްތީނަށް ނަސްރު ދިނުމެއް ނޫން ކަމަށެވެ.
