އިންޑިއާގެ އެރޯސް އިންވެސްޓްމަންޓްސް މެލޭޝިއާގައި 1 ބިލިއަން ޑޮލަރު އިންވެސްޓްކުރަން ނިންމައިފި
މެލޭޝިއާގެ ޑިޖިޓަލް އިކޮނޮމީ އަދި މުއާސަލާތީ ވަޒީރު ފަހްމީ ސަލެހް ވިދާޅުވެއްޖެ އިންޑިއާގެ އެންޓަރޓެއިންމަންޓް ކުންފުނި އެރޯސް އިންވެސްޓްމަންޓްސްއިން މެލޭޝިއާގައި 1 ބިލިއަން ޑޮލަރު އިންވެސްޓްކުރަން ނިންމާފައިވާ ކަމަށެވެ.
އެރޯސް އިންވެސްޓްމަންޓްސްއިން މި ފައިސާ އިންވެސްޓްކުރާނީ މެލޭޝިއާގެ ޑިޖިޓަލް އިންފްރާސްޓްރަކްޗަރ އަދި ކޮންޓެންޓް ހަބެއް ތަރައްޤީކުރުމަށް ކަމަށް ވަޒީރު ފަހްމީ ސަލެހް ވިދާޅުވިއެވެ. މިއީ މެލޭޝިއާގެ ޑިޖިޓަލް އިކޮނޮމީ ކުރިއެރުވުމަށް ލިބޭނެ ބޮޑު ކުރިއެރުމެއް ކަމަށް އެ މިނިސްޓަރު ފާހަގަކުރެއްވިއެވެ.
މި އިންވެސްޓްމަންޓްގެ ތެރެއިން އާޓިފިޝަލް އިންޓެލިޖެންސް އަދި ބްލޮކްޗެއިން ޓެކްނޮލޮޖީގެ ދާއިރާތަކަށް އަމާޒުކޮށްގެން މަސައްކަތްތަކެއް ކުރެވޭނެ ކަމަށް ވަޒީރު ވިދާޅުވިއެވެ. އަދި މީގެ ސަބަބުން މެލޭޝިއާގެ ޑިޖިޓަލް އިކޮނޮމީ އިތުރަށް ފުޅާވެގެންދާނެ ކަމަށް އުއްމީދުކުރެވޭ ކަމަށްވެސް އެ މިނިސްޓަރު ވިދާޅުވިއެވެ.
އެރޯސް އިންވެސްޓްމަންޓްސްއަކީ އިންޑިއާގެ ބޮލީވުޑް ފިލްމު އިންޑަސްޓްރީގައި ބޮޑު ހިއްސާއެއް އޮންނަ ކުންފުންޏެކެވެ. މި ކުންފުނިން މެލޭޝިއާގައި މިހާ ބޮޑު އަދަދެއްގެ ފައިސާ އިންވެސްޓްކުރަން ނިންމުމަކީ މެލޭޝިއާގެ ޑިޖިޓަލް އިކޮނޮމީއަށް ލިބޭނެ ވަރަށް ބޮޑު ހިތްވަރެއް ކަމަށް ބެލެވެއެވެ.
Ads by STO
