ސަލާހުއްދީން ސުކޫލްގެ އެންމެ މޮޅު ދަރިވަރަށް އަސްކޮއި ޓްރެވެލްސްއިން އުމްރާ ދަތުރެެއް!
ސަލާހުއްދީން ސުކޫލްގެ 2024 ވަނަ އަހަރުގެ ހުރިހާ ގޮތަކުން އެންމެ މޮޅު ދަރިވަރަކަށް، އަސްކޮއި ޓްރެވެލްސްގެ ފަރާތުން އުމްރާ ދަތުރެއް ހަދިޔާކުރަން ނިންމައިފި އެވެ.
އެކަން އިއުލާނުކުރީ މިއަދު ހެނދުނު އެ ސުކޫލްގެ ދަރިވަރުންނާއެކު ބޭއްވި އެސެމްބްލީގަ އެވެ. އެ އެސެމްބްލީގައި އަސްކޮއިގެ ފަރާތުން އެއްބަސްވުމުގައި ސޮއިކުރެއްވީ މެނޭޖާ ޖަމީލާ އަލީ އެވެ. ސަލާހުއްދީން ސުކޫލްގެ ފަރާތުން އެއްބަސްވުމުގައި ސޮއިކުރެއްވީ ސުކޫލްގެ ޕްރިންސިޕަލް ނާސިހާ އިދުރީސް އެވެ.
އެ ސުކޫލްގެ ޕްރިންސިޕަލް ވިދާޅުވީ، އަސްކޮއި ޓްރެވެލްސްގެ ފަރާތުން ލިބުނު ހަދިޔާ އަކީ، ކިޔަވަމުންދާ ދަރިވަރަކަށް ލިބުމަށް އެދެވޭނެ އެންމެ ބޮޑު އެއް ހަދިޔާ ކަމަށެވެ. އަދި އެއީ، އެތައް ދަރިވަރަކާއި ބެލެނެވެރިއެއް ހިތާހިތުން ލިބުމަށް އެދޭނެ ހަދިޔާއެއް ކަމަށްވެސް ޕްރިންސިޕަލް ފާހަގަކުރެއްވި އެވެ.
"އެ ހަދިޔާއެއްގެ ސަބަބުން ދަރިވަރެއްގެ ދުނިޔެއާއި އާހިރަތް ކާމިޔާބުވެގެން ދިއުމަށް އެންމެ ބޮޑަށް މަގުފަހިވެގެންދާނެ އެއް ހަދިޔާ މިއީ" ނާސިހާ އިދުރީސް
އެ އިއުލާނުކުރެވުނު ހަދިޔާގެ ސަބަބުން ރަނގަޅު ނަތީޖާއަކަށް ވާސިލުވުމަށް ދަރިވަރުންގެ މެދުގައި ގަދައަޅައި މަސައްކަތް ކުރުމުގެ ރޫހު އިތުރުވެގެން ދާނެ ކަމަށްވެސް ޕްރިންސިޕަލް ފާހަގަކުރެއްވި އެވެ.
"މިކަމުގެ ސަބަބުން ބެލެނިވެރިން ދަރިވަރުންނަށް ދެއްވަވާ ހިތްވަރު އިތުރުވާނެ. މި ހުރިހާ ސަބަބަކަށްޓަކައި އަސްކޮއި ޓްރެވަލްސްއަށް ސަލާހުއްދީން ސްކޫލުގެ މުޅި ޖަމާޢަތް ޝާމިލްވެގެންދާގޮތުގައި ޝުކުރު ދަންނަވަން." ސަލާހުއްދީން ސުކޫލްގެ ޕްރިންސިޕަލް.
ޕްރިންސިޕަލް ވަނީ ދުނިޔަވީ އަދި އުހުރަވީ މި ނަސީބު ލިބިގަތުމަށް ގަދައަޅާ މަސައްކަތްކުރުމަށް ދަރިވަރުންނަށް ހިތްވަރުދެއްވާފަ އެވެ.
އަސްކޮއި ޓްރެވެލްސްގެ މެނޭޖިން ޑިރެކްޓާ އަބްދުالله ރަޝީދު ވިދާޅުވީ އެއީ އަބަދުވެސް ވަރަށް ކުރާހިތުން ކުރައްވާ ކަމެއް ކަމަށެވެ. އެގޮތުން މީގެ ކުރިންވެސް އެކިއެކި ސުކޫލްތަކުގެ މި ހަދިޔާ ދީފައިވާނެ ކަމަށްވެސް ވިދާޅުވި އެވެ.
އަދި އެ ހަދިޔާގެ ސަބަބުން، ދަރިވަރުންނަށް ކިޔެވުމަށް އިތުރު ހިތްވަރަކާއި ބާރެއް ލިބިގެންދާނެ ކަމަށް ގަބޫލުކުރައްވާ ކަމަށާއި ހަދިޔާގެ ހަގީގީ މަގުސަދަކީ އެއީ ކަމަށްވެސް އޭނާ ވިދާޅުވި އެވެ.
ސަލާހުއްދީން ސުކޫލުގެ ކިޔެވުން ރަސްމީކޮށް ފެށީ 2023 ވަނަ އަހަރުގަ އެވެ. ނަމަވެސް ގްރޭޑް 10 ކިޔަވަދޭން ފެށީ މި ދިރާސީ އަހަރުގަ އެވެ. ހުޅުމާލެ ފޭސް 2 ގެ ހިޔާ ފްލެޓް ސަރަޙައްދުގައި ހިންގާ އެ ސުކޫލަކީ ރާއްޖޭގައި މިވަގުތު އާބާދީ އެންމެ ބޮޑު އެއް ސުކޫލެވެ.
