ބާރަށް ދުއްވާނަމަ އުޅަނދު ޓޯކޮށް, ލައިސެންސް ހިފަހައްޓާ, ލައިސެންސް ޕޮއިންޓް އުސޫލެއް ގާއިމް ކުރަނީ
ކަނޑައެޅިފައިވާ ސްޕީޑަށް ވުރެ ބާރަށް ދުއްވާ އުޅަނދުތައް ވަގުތުން ހުއްޓުވައި، އުޅަނދު ދުއްވާ ފަރާތުގެ ލައިސަންސްއާއި އުޅަނދުތައް ފުލުހުންގެ ބެލުމުގެ ދަށަށް ގެންނަން ފަށައިފި އެވެ.
ނުރައްކާތެރި އެކްސިޑެންޓްތަކަށް ހަރުކަށި ފިޔަވަޅުތަކެެއް އެޅުމަޒް ސަރުކާރުން ގިނަ ކަންކަން ނިންމައި، ރައީސް ޑރ. މުހައްމަދު މުއިއްޒު ދެންމެ "އެކްސް" ގައި ޕޯސްޓް ކުރެއްވި އެވެ.
އެ ކަންތައްތަކީ;
1. މަގުތަކަކީ އެންމެންނަށް ވެސް އަމާންކަމާއެކު ބޭނުން ކުރެވޭނެ ތަންތަން ކަމުގައި ހެދުމަށް ޓަކައި ބާރު ސްޕީޑުގައި ވެހިކަލް ދުއްވާ ފަރާތްތަކާ މެދު ހަރުކަށި ފިޔަވަޅުތައް އެޅުމަށް ގާނޫނާއި ގަވާއިދުތައް އިސްލާހު ކުރުން.
2. ރޭސިން އަދި ޑްރިފްޓިން އަށް ހުޅުމާލޭގެ ވަކި ސަރަހައްދެއް ބޭނުން ކުރުމަށް 19 އޮކްޓޯބަރު 2023 ގައި އެޗްޑީސީން ދީފައިވާ ހުއްދަ ވަގުތުން ބާތިލު ކުރުން.
3. ކަނޑައެޅިފައިވާ ސްޕީޑަށް ވުރެ ބާރަށް ދުއްވާ އުޅަނދުތައް ވަގުތުން ހުއްޓުވައި، އުޅަނދު ދުއްވާ ފަރާތުގެ ލައިސަންސް އާއި އުޅަނދުތައް ފުލުހުންގެ ބެލުމުގެ ދަށަށް ގެނައުން
4. ވަކި ސީސީ (ހޯސްޕަވާ) އަކުން ފެށިގެން މަތީގެ އެއްގަމުގައި ދުއްވާ އުޅަނދުތައް އާންމު މަގުތަކުގައި ބޭނުން ނުކުރެވޭ ގޮތަށް ގާނޫނާއި ގަވާއިދުތައް އިސްލާހު ކުރުން.
5. އެއްގަމު އުޅަނދުތަކުގެ ސައިލެންސަރު ބަދަލުކޮށްގެން އަޑުގަދަކޮށް ދުއްވުން ހުއްޓުވުމަށް އެފަދަ އާލާތްތައް އެތެރެކުރުން މަނާކުރުމަށް ގާނޫނާއި ގަވާއިދުތައް އިސްލާހު ކުރުން.
6. ހުޅުމާލެ މަގުމަތި ތަރުތީބު ކުރުމަށް ހުށަހަޅާފައިވާ ގޮތަށް ހުޅުމާލޭގެ 150 ސަރަހައްދެއްގައި ސްޕީޑް ބްރޭކަރ ހަރުކުރުމާއި ސްޕީޑް ޑިޓެކްޓިންގ ކެމެރާ ހަރުކުރުން.
7. ގްރެޖުއޭޓިން ލައިސަންސް ސިސްޓަމްއެއް ތައާރަފް ކުރުމާއި ގަވާއިދާ ހިލާފަށް ވެހިކަލް ދުއްވާ ފަރާތްތަކުގެ ލައިސަންސްއިން ޕޮއިންޓް ކަނޑަން ފެށުން.
8. މަގުމަތީގެ ގާނޫނުތަކާއި ގަވާއިދުތައް ތަންފީޒުކުރުމަށް ދިވެހި ފުލުހުންގ ހިދުމަތުން ކުރާ މަސައްކަތް މިހާރަށްވުރެ އިތުރުކޮށް ހަރުދަނާކުރުން.
ސަރުކާރުން މިފަދަ ނިންމުންތަކެއް މި ނިންމީ، ރޭ ފަތިހު މެރެތަނަށް ދުއްވަން ނުކުތް ސަމާހުގެ ގައިގައި ރޭސް ކާރަކުން ޖެހި ހޮސްޕިޓަލުގައި ފަރުވާ ދެމުން ދަނިކޮށް ނިޔާވެފައި ވަނިކޮށެވެ. އަދި އެ ކަމުގައި އާންމުންގެ ބަހުސް ބޮޑުވެފައި ވަނިކޮށެވެ.
