މިއަދު ރޯވި އިމާރާތުން އަލިފާން ނިއްވި ފަހުން އަނެއްކާ ވެސް ރޯވެއްޖެ

ދޫހިމެރިމަގާއި ސޯސަން މަގު ކަންމައްޗަށްވާ ގޮތަށް ހުރި ގާމަގު ކެފޭގައި އަލިފާން ރޯވެފައިވަނީ މިއަދު ހަވީރު ތިނެއް ޖަހާކަށް ހާއިރު އެވެ. އަލިފާން ނިއްވައިލެވުނީ ގާތްގަނޑަކަށް ގަޑިއިރެއްގެ ތެރޭގަ އެވެ. އެކަމަކު މީހަކަށް އެއްވެސް އަނިޔާއެއް ލިބިފައެއް ނުވެ އެވެ.

މީޑިއާތަކަށް މައުލޫމާތު ދިނުމަށް، ދިވެހި ފުލުހުންގެ ހިދުމަތުން ވަޓްސް އެޕްގައި ހުޅުވާފައި އޮންނަ ގްރޫޕަށް 9:22 ގައި ފޮނުވި މެސެޖެއްގައި ބުނީ އަނެއްކާ ވެސް އަލިފާން ރޯވި ކަމުގެ މައުލޫމަތު ލިބިގެން ފުލުހުންނާއި ސިފައިން ހަރަކާތްތެރިވަމުންދާ ކަމަށެވެ.

އެމްއެންޑީއެފުން ބުނީ ފަހުން އަލިފާން ރޯވި ނަމަވެސް ފެތުރެމުން ނުދާ ކަމަށެވެ. ފަހުން ރޯވީ، ގިނަ އަދަދަކަށް ޓިނާއި ލަކުޑިން ހަދާފައިވާ ތަނަކަށް ވާތީ ދަށުގައި ހުރި ލަކުޑި ތަކުގައި އަލިފާނުގެ އަސަރު ހުރުމުން ދޭތެރެ ދޭތެރެއިން ހުޅުހިފާ ގޮތް ވެގެން ކަމަށެވެ.

"މިހާރު ނިއްވާލާފަ މޮނިޓާ ކުރަމުން ދަނީ،" އެމްއެންޑީއެފުން ބުންޏެވެ.

މިއަދު ރޯވި ތަނުގައި 50 ބިދޭސީން ދިރިއުޅޭ ކަމަށް ނެޝެނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފައިވެ އެވެ.