ކޮމަންވެލްތުން މަދަނީ ޖަމިއްޔާތަކަށް ގްރާންޓް ދޫކުރަނީ
ކޮވިޑް-19އާއި ގުޅިގެން މަދަނީ ޖަމިއްޔާތަކުން ހިންގުމަށް ރާވައިފައިވާ ޕްރޮގްރާމްތަކަށް އެހީތެރިވުމަށްޓަކައި ކޮމަންވެލްތުގެ ފަރާތުން ދޭ ގްރާންޓަށް އެދި ޕްރޮޕޯސަލް ހުށަހެޅުމުގެ ފުރުސަތު މިނިސްޓްރީ އޮފް ޔޫތު، ސްޕޯރޓްސް އެންޑް ކޮމިއުނިޓީ އެމްޕަވަރމަންޓުން ހުޅުވާލައިފިއެވެ
މި ފުރުސަތަކީ ކޮންމެ އަހަރަކުވެސް ކޮމްނަވެލްތުގެ ގައުމުތަކަށް ހާއްސަކޮށްގެން ކޮމަންވެލްތު ފައުންޑޭޝަން އިން ހުޅުވާލާ ފުރުސަތެކެވެ. މި ފުރުސަތަށް ކުރިމަތިލައި ހޮވޭ ފަރާތްތަކަށް 10،000 ޕައުންޑާއި 30،000 ފައުންޑާއި ދެމެދުގެ އަދަދަކަށް ފައިސާ، 12 މަހަށް ބަހާލައިގެން ދޭނެއެވެ.
މި ގްރާންޓް ދިނުމުގައި އިސްކަން ދެވޭނީ ސަރުކާރު ހިންގުމުގައި ރައްޔިތުންގެ ބައިވެރިވުން އިތުރުވާނޭ ފަދަ ގޮތަކަށް ހިންގުމަށް ހަމަޖެހިފައިވާ ޕްރޮޖެކްޓްތަކަށް ކަމަށް ކޮމަންވެލްތު ފައުންޑޭޝަން އިން ކޮށްފައިވާ އިއުލާނުގައި ބުނެފައިވެއެވެ. މިގޮތުން ކޮވިޑް-19 ގެ ސަބަބުން ދުނިޔޭގެ އެކި ކަންކޮޅުތަކުގައި ކުރިން ދިމާ ނުވާފަދަ މައްސަލަތަކެއް ދިމާވެފައިވާ ކަމަށާއި އެކަންތައްތައް ހައްލުކުރުމަށް އިސްކަންދިނުމަށް ކޮމަންވެލްތު ފައުންޑޭޝަނުން އެދެއެވެ.
މިނިސްޓްރީ އޮފް ޔޫތު، ސްޕޯރޓްސް އެންޑް ކޮމިއުނިޓީ އެމްޕަަވަރމަންޓުން ވަނީ ޖަމިއްޔާތަކާއެކު އޮންލައިން މަޝްވަރާ ބައްދަލުވުމެއް 1 ސެޕްޓެމްބަރުގައި ބާއްވާފައެވެ. "ދެން" އަށް މައުލޫމާތު ދެއްވަމުން ޖަމިއްޔާތަކުގެ ރަޖިސްޓްރާ އަހްމަދު އިރާޝް ވިދާޅުވީ މި ބައްދަލުވުމުގައި ބައިވެރިވި ހުރިހާ ޖަމިއްޔާއަކުންވެސް ވަނީ އެ ޖަމިއްޔާތަކަށް ދިމާވާ ދަތިތައް މި ބައްދަލުވުމުގައި ހިއްސާ ކޮށްފައި ކަމަށެވެ. އަދި އެދަތިތަކުން އަރައިގަތުމަށް ޓަކައި މިނިސްޓްރީ އިން ވެވެން އޮތް އެހީތެރިކަމެއް ވެދެއްވުމަށް މަސައްކަތް ކުރަމުން ގެންދަވާ ކަމުގައިވެސް އިރާޝް ފާހަގަ ކުރެއްވިއެވެ.
މި ގްރާންޓަށް އެދި ޕްރޮޕޯސަލް ހުށަހެޅުމުގެ މި ފުރުސަތު ހުޅުވާލައިފައިވަނީ 1 ސެޕްޓެމްބަރ 2020 އިން ފެށިގެން 18 ސެޕްޓެމްބަރުގެ 2020 ވަނަ ދުވަހުގެ 13:00 ގެ ނިޔަލަށެވެ.
Ads by STO
