ބަންގްލަދޭޝް މީހެއްގެ އަތުން 4 ކިލޯ އަށްވުރެ ގިނަ ކެނަބިސް
ރާއްޖެ އައި ބަންގްލަދޭޝް މީހެއްގެ އަތުން 4 ކިލޯއަށް ވުރެ ގިނަ ކެނަބިސް އަތުލައިިގެންފިއެވެ.
މޯލްޑިވްސް ކަސްޓަމްސް އިން ހާމަކުރިގޮތުގައި މިމަހުގެ 8 ވަނަ ދުވަހުގެ ރޭ ވައިގެމަގުން ރާއްޖެއައި އުމުރުން 28 އަހަރުގެ ބަންގްލަދޭޝް ފިރިހެނެއްގެ އަތުން ވަނީ 4 ކިލޯ އަށް ވުރެ ގިނަ މަސްތުވާތަކެތި އަތުލައި ގަނެފައެވެ.
މިތަކެތީގެ މަގުމަތީ އަގު ގާތްގަޑަކަށް 3,558,400 (ތިން މިލިއަން ފަސް ލައްކަ ފަންސާސް އައްހާސް ހަތަރު ސަތޭކަ) ރުފިޔާއަށް އަރާނެކަމަށް ވެސް ކަސްޓަމްސް ވިދާޅުވެއެވެ.
އެގޮތުން މިމީހާގެ ލަގެޖް ބަލައި ފާސްކުރިއިރު، މަސްތުވާތަކެތީގެ ބާވަތެއް ކަމަށްވާ ކެނަބިސްއަށް ޝައްކުކުރެވޭ ހިކިފަތްތަކެއް ފެނިގެން އެތަކެތި ފުރަތަމަ މަރުހަލާގައި ތަޙްލީލު ކުރިއިރު ކެނަބިސް އަށް ފައްސިވެފައިވާ ކަމަށްވެސް ކަސްޓަމްސް އިން ވިދާޅުވެއެވެ.
މިތަކެތި ފުލުހުންނާ ހަވާލުކޮށް މި މައްސަލަ އަންނަނީ އިތުރަށް ތަހުގީގު ކުރަމުންނެވެ.
