މިއަދުން ފެށިގެން ރާއްޖެ އާދެވޭނީ ކޮވިޑަށް ނައްސި ވެފައިވާ ފަތުރުވެރިންނަށް އެކަނި
ރާއްޖެ އަަންނަ ފަތުރުވެރިން ކޮވިޑް-19 ގެ ނައްސި ޓެސްޓެއް އޮތުން ލާޒިމް ކުރުމަށް ސަރުކާރުން ނިންމި ނިންމުން ތަންފީޒު ކުރަން ފަށައިފިއެވެ.
ޓޫރިޒަމް މިނިސްޓްރީ އިން ބުނެފައިވަނީ މިއަދުގެ މިހާތަނަށް ރާއްޖެ އައި ހުރިހާ ޓޫރިސްޓުން ވެސް ކޮވިޑަށް ނައްސި ކަމުގެ ލިޔުން ވެލާނާ އިންޓަނޭޝަނަލް އެއާޕޯޓަށް ހުށަހަޅާފައިވާ ކަމަށެވެ. އަދި ނައްސިކަން ޔަގީން ކުރުމަށް ޓޫރިޒަމް މިނިސްޓްރީގެ އޮފިޝަލަކު މިއަދުން ފެށިގެން ވެލާނާ އިންޓަނޭޝަނަލް އެއާޕޯޓުގައި ހުންނާނެ ކަމުގައި ވެސް އެ މިނިސްޓްރީ އިން ވަނީ ބުނެފައެވެ.
މިފަދަ ފިޔަވަޅެއް އެޅީ ރާއްޖޭގައި މި ބަލި ކޮންޓްރޯލްނުވެ ފެތުރެމުންދާއިރު ރާއްޖެއަކީ ރައްކާތެރި ފަތުރުވެރިކަމުގެ މަންޒިލެއްކަން ކަށަވަރު ކުރުމަށްޓަކައި ކަމުގައި މީގެ ކުރިން ޓޫރިޒަމް މިނިސްޓްރީއިން ވަނީ ބުނެފައެވެ.
އެޗްޕީއޭއިން ވަނީ ފަތުރުވެރިންނަށް ޕީސީއާރް ޓެސްޓް ހެދޭނެ އިންތިޒާމް ހަމަޖެހިފައިވާ ހޮސްޕިޓަލްތަކާއި، އެތަންތަނުން ޓެސްޓް ހަދައިދޭ އަގުތައް މިދިޔަ މަހުގެ 14 ވަނަ ދުވަހު އާންމުކޮށްފައެވެ.
އެގޮތުން މާލޭ ސަރަޙައްދުގައި ހިމެނޭ ތިން ހޮސްޕިޓަލަކާއި، ރާއްޖޭގެ އުތުރުން ކުޅުދުއްފުށި ސިޓީއާއި އެންމެ ދެކުނުން އައްޑޫ ސިޓީގައި ފަތުރުވެރިންނަށް ކޮވިޑް-19 އަށް ޓެސްޓްކުރެވޭނެ އިންތިޒާމް އެޗްޕީއޭއިން ވަނީ ހަމަޖައްސާފައެވެ.
