ހިޔާވެހި ފައިނޭންސިން ސްކީމަށް ހުށަހެޅުމުގެ ފުރުސަތު ހުޅުވާލައިފި
ގެދޮރު އަޅަން ބޭނުންވާ ފަރާތްތަކަށް ދޫކުރާ ހިޔާވެހި ފައިނޭންސިން ސްކީމަށް އެދި ހުށަހެޅުމުގެ ފުރުސަތު ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީން ހުޅުވާލައިފި އެވެ.
"ހިޔާވެހި ފައިނޭންސިން ޕްރޮގްރާމް" އިފުތިތާހުކޮށްފައި ވަނީ މިދިޔަ އަންގާރަ ދުވަހު އިސްލާމީ މަރުކަޒުގައި ބޭއްވި ހާއްސަ ރަސްމިއްޔާތެއްގަ އެވެ. އެ ރަސްމިއްޔާތުގައި ރައީސް ވިދާޅުވީ މި ޕްރޮގްރާމަކީ ގެދޮރުވެރިކަމުގެ މައްސަލަ ހައްލު ކުރުމަށް ކުރާ މަސައްކަތުގެ އެންމެ މުހިންމު އެއް ކަންތައް ކަމަށާއި ރައްޔިތުންގެ އެހީތެރިކަމާ އެކު މުޅި މައްސަލައަށް މި ސަރުކާރުން ހައްލު ހޯދާނެ ކަމަށެވެ.
ހައުސިން މިނިސްޓްރީން މިއަދު "އެކްސް" ގައި ކުރި ޕޯސްޓެއްގައި ބުނީ ހިޔާވެހި ފައިނޭންސިން ޕްރޮގްރާމަށް އެދި "ހިޔާވެހި ޕޯޓަލް" މެދުވެރިކޮށް ހުށަހެޅުމުގެ ފުރުސަތު މިހާރު އާންމުކޮށް ހުޅުވާލާފައިވާ ކަމަށެވެ.
ހިޔާވެހި ފައިނޭންސިން ޕްރޮގްރާމަކީ ތާރީހުގައި އެންމެ ހެޔޮއަގުގައި ގެދޮރުވެރި ކަމަށް ދޫކުރެވޭ ލޯނު ކަމަށެވެ. މި ލޯނު ދޫކުރާނީ އިސްލާމީ އުސޫލުން ކަމުގައި މިނިސްޓްރީން ވަނީ ފާހަގަކޮށްފަ އެވެ.
ހިޔާވެހި ސްކީމުގެ ދަށުން ފައިނޭންސިން ދޫކުރުމަށް ހަމަޖެހިފައި ވަނީ ތިން ކެޓަގަރީއަކަށް ބަހާލައިގެންނެވެ. އެއީ؛
ރަށްވެހި: މިއީ އަތޮޅުތަކުގައި ގެދޮރު އެޅުމަށް ދޫކުރާ ލޯނެވެ. މި ސްކީމަށް އިކުއިޓީއެއް ބަހަައްޓާކަށް ނުޖެހެ އެވެ. ގިނަވެގެން އެއް މިލިއަން ރުފިޔާ ދޫކުރާއިރު، 25 އަހަރު ދުވަހަށް ބަހާލައިގެން އަދާކުރުމުގެ ފުރުސަތު ލިބެ އެވެ.
ސަހަރު: މިއީ އާބަން ޑެވޮލަޕްމަންޓް ސެންޓަރުތަކުގެ ގޮތުގައި ތަރައްގީ ކުރާ ސަރަހައްދުތަކުގައި ގެދޮރު އެޅުމަށް ދޫކުރެވޭ ލޯނެވެ. ސްކީމަށް 5-10 އިންސައްތަ އާ ދެމެދުގެ އިކުއިޓީއެއް ބަހައްޓަން ޖެހެ އެވެ. އެންމެ ގިނަވެގެން ތިން މިލިއަން ރުފިޔާ ލިބޭއިރު، 25 އަހަރު ދުވަހަށް ބަހާލައިގެން ދެއްކުމުގެ ފުރުސަތު ލިބެ އެވެ.
ފަހިމާލެ: މިއީ ފުރަމާލޭގައި ގެދޮރު އެޅުމަށް ދޫކުރެވޭ ލޯނެވެ. މި ސްކީމަށް 5-10 އިންސައްތަ އާ ދެމެދުގެ އިކުއިޓީއެއް ބަހައްޓަން ޖެހެ އެވެ. ގިނަވެގެން ހަ މިލިއަން ދޫކުރާއިރު، 25 އަހަރު ދުވަހަށް ބަހާލައިގެން އަދާކުރުމުގެ ފުރުސަތު ލިބެ އެވެ.
ހިޔާވެހި ޕޯޓަލްއަށް ލޮގިން ކުރެވޭނީ އީފާސް މެދުވެރިކޮށެވެ. އެއަށްފަހު ޖެހޭނީ އެ ފަރާތެއްގެ ހައުސިން ޕްރޮފައިލް ފުރިހަމަ ކުރާށެވެ. ހައުސިން ޕްރޮފައިލް ފުރިހަމަވެ، ވެރިފައިވުމުން ހައުސިން ސްކީމް ނުވަތަ ލޯނު ސްކީމުތަކަށް ޝަރަތު ހަމަވާ ސްކީމުތައް ފެންނާނެ އެވެ. އަދި ޝަރުތު ހަމަވާ ސްކީމުތަކަށް ފޯމު ހުށަހެޅުމުގެ ފުރުސަތު ލިބޭނެ އެވެ.
Ads by STO
