ގަވާއިދާ ހިލާފަށް އުޅުނު 13 ބިދޭސީއަކު އަތުލައިގެންފި
ގަވާއިދާ ހިލާފަށް އުޅޭ ބިދޭސީން ހޯދުމަށް ކުރިއަށް ގެންދިޔަ ރެއިޑެއްގައި ގިނަ އަދަދެއްގެ ބިދޭސީން އަތުލައިގެންފި އެވެ.
މޯލްޑިވްސް އިމިގްރޭޝަނުން މިއަދު "އެކްސް" ގައި ކުރި ޕޯސްޓެއްގައި ބުނީ ގަވާއިދާ ހިލާފަށް އުޅޭ ބިދޭސީން ބަލައި ފާސްކުރުމަށް މިދިޔަ ބުދަ ދުވަހު ރެއިޑް އޮޕަރޭޝަނެއް ކުރިއަށް ގެންގޮސްފައިވާ ކަމަށެވެ.
އެ އޮޕަރޭޝަނުގައި މާލޭގައި ބިދޭސީން ދިރިއުޅެމުންދިޔަ ދެ ތަނެއް ބަލައި ފާސްކުރި ކަމަށް އިމިގްރޭޝަނުން ބުނެ އެވެ.
އެ ދެ ތަނުން ސައްހަ ވިސާއެއް ނެތި ގަވާއިދާ ހިލާފަށް އުޅެމުންދިޔަ 13 ބިދޭސީއަކު އެ އިދާރާގެ ބެލުމުގެ ދަށަށް ވަނީ ގެންގޮސްފަ އެވެ.
ގަވައިދާ ހިލާފަށް އުޅޭ ބިދޭސީން ހޯދުމަށް އިމިގްރޭޝަނުން ހިންގާ އޮޕަރޭޝަންތައް ފުޅާކޮށްފައިވާއިރު، ކޮންމެ ދުވަހަކުހެން ދަނީ ރެއިޑްތައް ކުރަމުންނެވެ.
މިފަހުން ހުޅުމާލޭގައި ކުރިއަށް ގެންދިޔަ ރެއިޑްތަކުގައި އެތަކެއް ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފައިވާއިރު، އެކަމުގައި ބޮޑަށް އިސްކަންދެނީ ގަވާއިދާ ހިލާފަށް ރާއްޖޭގައި ވިޔަފާރިކުރާ ފަރާތްތައް ހޯދުމަށެވެ.
ބިދޭސީންގެ މައްސަލަ ހައްލު ކުރުމަށް ބިދޭސީންގެ ބަޔޯމެޓްރިކް ޑޭޓާ ވެސް މިހާރު ދަނީ ނަގަމުންނެވެ.
