ސިލްސިލާކޮށް މާރާމާރީ ހިންގާ ބަޔަކު ހައްޔަރުކޮށްފި
ސިލްސިލާކޮށް ހިންގަމުން އައި މާރާމާރީތަކަކާ ގުޅިގެން ބަޔަކު ހައްޔަރުކޮށް، ބަންދުގެ މުއްދަތު ޖަހައިފި އެވެ.
ކްރިމިނަލް ކޯޓުން ނެރުނު ބަންދު އަމުރުގައިވާ ގޮތުން އެ މައްސަލައިގައި ހައްޔަރުކޮށްފައި ވަނީ ދިވެހި ހަތަރު ފިރިހެނުންނެވެ.
އެއީ 21 އަހަރުގެ ދެ ފިރިހެނުންނާއި 22 އަހަރާ އަދި 23 އަހަރުގެ ދެ ފިރިހެނުންނެވެ.
ބަންދު އަމުރުގައިވާާ ގޮތުން އެ މީހުންގެ މައްޗަށް ތުހުމަތުކޮށްފައި ވަނީ ޖަމާއަތް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގުމެވެ. އެ އެންމެންނަކީ ވެސް ބަންދުގެ ރެކޯޑް އޮންނަ މީހުންނެވެ.
ބަންދު އަމުުރުގައިވާ ގޮތުން އެ ހަތަރު މީހުން މާރާމާރީ ހިންގުމަށްފަހު އެކުއެކީ ދިޔައީ އދ. މަހިބަދޫ އަށެވެ.
އެ މީހުން އެންމެ ފުރަތަމަ ހައްޔަރުކުރީ މަހިބަދޫންނެވެ. ނަމަވެސް ފަހުން އެ މީހުން ދޫނިދޫ ޖަލަށް ވަނީ ބަދަލުކޮށްފަ އެވެ.
ކްރިމިނަލް ކޯޓުން އިއްޔެ ވަނީ އެ އެންމެން ވެސް ޝަރީއަތް ނިމެންދެން ބަންދު ކުރުމަށް އަމުރުކޮށްފަ އެވެ.
އެ މާރާމާރީ އާ ގުޅޭ ސީދާ ތަފުސީލެއް ނުލިބެ އެވެ.
މާލޭގައި ގޭންގު މާރާމާރީގެ މައްސަލަ ބޮޑުވެފައިވާއިރު ރޭގައި 12 މީހުންގެ ގޭންގަކުން ވަނީ މީހަކު ރަހީނުކޮށް އޭނާގެ އިނގިލި ބުރިކޮށްލަން އުޅެފަ އެވެ.
އެހެންނަމަވެސް ފުލުހުން ވަނީ އެ މީހާ ސަލާމަތް ކޮށްފަ އެވެ.
Ads by STO
