އުތުރާއި ދެކުނު، އާބަން ސެންޓަރު ލިސްޓުން އުނިވި ސަބަބު ސާފުކޮށްދޭންޖެހޭ: ޝާހިދު
މި ސަރުކާރުން އާބަން ސެންޓަރުގެ ގޮތުގައި ކަނޑައެޅި ރަށްތަކުގެ ތެރޭގައި ރާއްޖޭގެ އުތުރާއި ދެކުނު ރަށްތައް ނެތުމުން އިދިކޮޅު މައި ޕާޓީ، އެމްޑީޕީގެ ރައީސް އަބްދުﷲ ޝާހިދު މިއަދު ކަންބޮޑުވުން ފާޅުކޮށްފި އެވެ.
ރާއްޖޭގެ 7 ސަރަހައްދެއްގައި އާބަން ސެންޓަރު ގާއިމުކުރުމަކީ ރައީސް ޑރ މުހައްމަދު މުއިއްޒުގެ ވައުދުފުޅަކަށްވާއިރު އާބަން ސެންޓަރު ގާއިމުކުރާ ރަށްތައް ހައުސިން، ލޭންޑިން އެންޑް އާބަން ޑިވޮލެޕްމެންޓް އިން މިއަދު ވަނީ އިއުލާންކޮށްފަ އެވެ.
އެ 7 ރަށަކީ:
- ރ. އުނގޫފާރު
- ބ. އޭދަފުށީ
- ޅ. ނައިފަރު
- އދ. މަހިބަދޫ
- ފ. ނިލަންދޫ
- ދ. ކުޑަހުވަދޫ
- ލ. ފޮނަދޫ
އެ ސެންޓަރުތައް އިއުލާންކުރުމާ ގުޅިގެން 'އެކްސް' ގައި ކުރި ޕޯސްޓެއްގައި ކުރީގެ ފޮރިން މިނިސްޓަރު ޝާހިދު ވިދާޅުވީ އާބަން ސެންޓަރުތަކުގެ ގޮތުގައި ހަމަޖެއްސި ލިސްޓުގައި ބައެއް ސަރަހައްދުތައް އުނިވި ސަބަބު ސަރުކާރުން ރައްޔިތުންނަށް ސާފުކޮށްދޭން ޖެހޭ ކަމަށެވެ.
"އާބަން ސެންޓަރު ކަނޑައެޅުމުގައި ބޮޑުތިލަދުންމައްޗާއި، ރާއްޖޭގެ ދެކުނުގެ ސަރަހައްދު އުނިވެފައި މިވާ ސަބަބު އެސަރަހައްދު ތަކުގައި ދިރިއުޅޭ ރައްޔިތުންނަށް ސަރުކާރުން ސާފުކޮށްދޭންޖެހޭ" ޝާހިދު ވިދާޅުވި އެވެ.
އެމްޑީޕީގެ ރައީސް ދެކިވަޑައިގަންނަވާ ގޮތުގައި އެފަދަ ކަންކަން ނިންމުމުގައި ރަށު ކައުންސިލްތަކާއި އަތޮޅު ކައުންސިލްތަކުގެ މަޝްވަރާ ހޯދުމަކީ މުހިންމެވެ. އާބަން ސެންޓަރުގެ ގޮތުގައި ރަށްތަކެއް ކަނޑައެޅުމުގެ މަގްސަދަކީ ލާމަރުކަޒީ ނިޒާމުން ރަށް ރަށް ހިންގުމުގެ ނިޒާމުން އެރަށްތައް ވަކިކޮށް މާލޭން ހިންގަން ފެށުން ކަމުގައިވެގެން ނުވާނެ ކަމަށްވެސް ވިދާޅުވި އެވެ.
ކުރީގެ ފިނޭންސް މިނިސްޓަރު އިބްރާހިމް އަމީރުވެސް ވަނީ އާބަން ސެންޓަރުތަކުގެ ލިސްޓާ މެދު ކަންބޮޑުވުން ފާޅުކޮށްފަ އެވެ.
އަމީރު، 'އެކްސް' ގައި ކުރި ޕޯސްޓެއްގައި ވިދާޅުވީ ދައުލަތުގެ ފައިސާ ހަރަދުކޮށްގެން ގައުމީ ތަރައްގީގެ ބޮޑެތި ޕްލޭންތަކެއް ހެދުމުގެ ބޭނުމެއް ނެތް ކަމަށެވެ.
ކޮބާ ކުޅުދުއްފުށި، ގދ. ތިނަދޫ، ލ.ގަން، އައްޑޫ، ފުވައްމުލައް... ހަގީގީ މާނައިގައި މި ގައުމު ތަރައްގީކުރުމުގެ 'ވިޒަން' އެއް މި ސަރުކާރުގެ ނެތްކަން ވަރަށް ސާފު.
އަމީރު ވިދާޅުވީ އެ ލިސްޓުގައި ހިމެނޭ ރަށްތައްވެސް ތަރައްގީކުރަން ޖެހޭނެ ކަމަށެވެ. އެކަމަކު ޒަމާނުއްސުރެ އާބަން ސެންޓަރުތަކުގެ ގޮތުގައި ބަލަމުން އައި، ވިޔަފާރި މަރުކަޒުތަކަށް ދެންވެދާނެ ގޮތަކާއި މެދު އަމީރު ވަނީ ކަންބޮޑުވުން ފާޅުކޮށްފަ އެވެ.
ރައީސް ޑރ މުހައްމަދު މުއިއްޒު ވިދާޅުވެފައިވާ ގޮތުން އާބަން ސެންޓަރުގައި ސިއްހީ ނިޒާމުގެ ތެރެއިން އެންމެ މުހިންމު ހުރިހާ ދާއިރާއަކުން ހިދުމަތް ދެވެން ހުންނާނެ ކަމަށެވެ. އެގޮތުން އެކިކަހަލަ ތެރެޕީތައްވެސް ދެވޭނެކަމަށްވެސް ރައީސް ފާހަގަކުރެއްވި އެވެ. އަދި ތައުލީމީ ނިޒާމުވެސް އެންމެ މަތީ ފެންވަރުގައި ގާއިމުކުރައްވާނެކަމަށާއި، މަގުތައްވެސް އެންމެ ރަނގަޅަށް ހަދައި އަދި ދެންހުރި ކަންކަން ވެސް އެންމެ ރަނގަޅަށް ގާއިމުކުރެވިފައި ހުންނާނެކަމަށްވެސް ރައީސް ވަނީ ވިދާޅުވެފަ އެވެ.
