ސެލޫނަކުން 5 ބިދޭސީއަކު އިމިގްރޭޝަންގެ ބެލުމުގެ ދަށަށް
ރާއްޖޭގައި ގަވައިދާ ހިލާފަށް އުޅެމުންދިޔަ 5 ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.
އިމިގްރޭޝަން އިން ރޭ "އެކްސް" ގައި ކުރި ޕޯސްޓެއްގައި ބުނީ ގަވައިދާ ހިލާފަށް އުޅޭ ބިދޭސީން ހޯދަން ބަލައި ފާސްކުރުމަށް ހިންގަމުންދާ އޮޕަރޭޝަންގެ ތެރެއިން މިިދިޔަ ހޮނިހިރު ދުވަހު ހުޅުމާލެގައި ސެލޫން ހިންގަމުންދިޔަ 6 ތަނެއް ބަލައި ފާސްކޮށްފައިވާ ކަމަށެވެ.
އިމިގްރޭޝަން އިން ބުނީ އެ 5 މީހުން އިމިގްރޭޝަންގެ ބެލުމުގެ ދަށަށް ގެންގޮސްފައިވަނީ ސައްހަ ވިސާއެއް ނެތި އުޅެމުންދާ މައްސަލައާ ގުޅިގެން ކަމަށެވެ. ނަމަވެސް އެ ބިދޭސީންގެ ވަނަވަރެއް ހާމައެއްނުކުރެ އެވެ.
އިމިގްރޭޝަނުން އެ މަސައްކަތް ކުރިއަށް ގެންދަނީ ފުލުހުންނާ ގުޅިގެންނެވެ.
ގަވައިދާ ހިލާފަށް އުޅޭ ބިދޭސީން ހޯދުމަށް އިމިގްރޭޝަނުން ހިންގާ އޮޕަރޭޝަންތައް ފުޅާކޮށްފައިވާއިރު، މިދިޔަ މަހު ވަނީ މި އޮޕަރޭޝަން އަތޮޅު ތެރޭގައިވެސް ކުރިއަށްގެންދަން ފަށާފަ އެވެ.
ބިދޭސީންގެ މައްސަލަ އިތުރުވުމާ ގުޅިގެން އެފަދަ މައްސަލަތައް ރިޕޯޓު ކުރުމަށް ހާއްސަކޮށް އިމިގްރޭޝަނުން، އިމިގްރޭޝަން ވޮޗް އިފުތިތާހުކޮށްފައި ވަނީ މިދިޔަ ޖުލައި މަހުގެ 17 ވަނަ ދުވަހު އެވެ.
