ޑޮލަރު މާރުކުރަން 173 ރިސޯޓަކުން ރަޖިސްޓްރީވެއްޖެ
ރާއްޖެ އަންނަ ކޮންމެ ޓޫރިސްޓަކަށް ވަކި ރޭޓެއްގެ ދަށުން ޑޮލަރު މާާރުކުރަން މަޖުބޫރުވާ ގޮތަށް އެމްއެމްއޭއިން އެކުލަވާލާފައިވާ އާ ގަވާއިދުގެ ދަށުން 173 ރިސޯޓެއް ރަޖިސްޓަރީވެފައިވާ ކަމަށް މަރުކަޒީ ބޭންކް (އެމްއެމްއޭ) އިން މިރޭ ބުނެފި އެވެ.
އެމްއެމްއޭއިން މިރޭ މީީޑިއާތަކަށް ފޮނުވި މެސެޖެއްގައި ބުނީ، ރާއްޖޭގައި ހިންގަމުން އަންނަ 174 ރިޒޯޓުގެ ތެރެއިން 173 ރިޒޯޓު އެ ގަވައިދުގެ ދަށުން އެމްއެމްއޭގައި ރެޖިސްޓާވެފައިވާ ކަމަށެވެ.
"ބޭރުފައިސާއާ ބެހޭ ގަވާއިދުގެ ދަށުން އެމްއެމްއޭގައި ރާއްޖޭގައި އޮޕަރޭޓްކުރާ އެއް ރިސޯޓު ފިޔަވައި އެހެން ހުރިހާ ރިސޯޓަކުން ރަޖިސްޓަރީ ވެއްޖެއެވެ" އެމްއެމްއޭއިން ބުންޏެވެ.
ބޭންކަށް މާރުކުރަން މަޖުބޫރުކުރަން
އާ ގަވާއިދާ އެކު ކެޓަގަރީ އޭ ޓޫރިސްޓު ވިޔަފާރިތަކުން މީލާދީ މަހެއްގައި އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން، އެ މަހަަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ދައްކަން ޖެހޭނެ އެވެ. އެ އުސޫލުން ކެޓަގަރީ ބީން ދައްކަން ޖެހޭނީ 25 ޑޮލަރުގެ ރޭޓުންނެވެ.
ކެޓަގަރީ އޭގެ ޓޫރިސްޓު ވިޔަފާރިއަކަށް އެ އަދަދަށް ފައިސާ ނުލިބޭނަމަ މީރާއަށް ހުށަހެޅުމަށް ގަވާއިދުގައި ބުނެފައިވެ އެވެ. އެ ގޮތުން ބަލަން ޖެހޭ ކަންކަން ބެލުމަށް ފަހު ގަވާއިދުގައި ބުނާ އަދަށް ވުރެ ދަށް އަދަދެއް އެ ވިޔަފާރިއަކަށް ކަނޑައެޅުމުގެ ބާރު އެމްއެމްއޭއަށް ލިބިގެންވާ ކަމަށް ވެސް ގަވާއިދުގައި ބުނެފައިވެ އެވެ.
އެ ހުއްދަ ދިނުމުގައި ބެލޭނެ ކަންކަމުގެ ތެރޭގައި ހުރީ:
- ބޭރު ފައިސާއިން އަދާކުރަން ޖެހިފައިވާ ޓެކްސް
- މާލީ އިދާރާތަކަށް ބޭރު ފައިސާއިން އަދާކުރަން ޖެހިފައިވާ ދަރަނި
- ކޯޓު ހުކުމެއްގައި ދެއްކުމަށް ކަނޑައެޅިފައިވާ ބޭރު ފައިސާގެ އިލްތިޒާމުތައް
- އޮތޯރިޓީން ހުއްދަ ދޭ އެހެން ވެސް ބޭރު ފައިސާގެ އިލްތިޒާމުތައް
ގަވާއިދުގައި ބަޔާންކުރާ މި މާއްދާތަކާ ހިލާފުވާ ވިޔަފާރިތައް 5،000 ރުފިޔާއާއި 1 މިލިއަން ރުފިޔާއާ ދެމެދުގެ އަދަދަކުން އެމްއެމްއޭން ޖޫރިމަނާ ކުރެވޭނެ ކަމަށް ވެސް ބުނެފައިވެ އެވެ.
