މަސް މާރުކޭޓު ސަރަހައްދުގައި ވިޔަފާރިކުރަން އުޅުނު 39 ބިދޭސީން އަތުލައިގެންފި
މާލޭ މަސް މާރުކޭޓު ސަރަހައްދުގައި ގަވާއިދާ ހިލާފަށް ވިޔަފާރިކުރަން އުޅުނު ގިނަ އަދަދެއްގެ ބިދޭސީން އަތުލައިގެންފި އެވެ.
އިމިގްރޭޝަން ކޮންޓްރޯލަރު މުހައްމަދު ޝަމްއާން އެކްސްގައި މިރޭ ވިދާޅުވީ މަސް މާރުކޭޓް ސަރަަހައްދުުގައި ބިދޭސީން ވިޔާފަރިކުރަމުންދާތީ ކަންބޮޑުވުން އޮތީ ފާޅުކޮށްފައި ކަމަށެވެ.
އެހެންވެ އިމިގްރޭޝަންގެ ޓާސްކު ފޯހުން މަސް މާރުކޭޓް ސަރަހައްދުގައި އަޅާފައިވާ މަސް ބޯޓުތައް ބަލައި ފާސްކުރުމަށް ހާއްސަ އޮޕަރޭޝަނެއް ކުރިއަށް ގެންދިޔަ ކަމށް އޭނާ ވިދާޅުވި އެވެ.
އަދި 39 ބިދޭސީއަކު އިމިގްރޭޝަންގެ ބަންދަށް ގެންދިޔަ ކަމަށް ވެސް ޝަމްއާން ވިދާޅުވި އެވެ.
މަސް މާރުކޭޓް ސަރަހައްދާއި ލޯކަލް މާރުކޭޓް ސަރަހައްދަކީ ބިދޭސީންގެ ވިޔަފާރިކުރާ އައްޑާ އެކެވެ.
މީގެ ކުރީ ސަރުކާރުތަކުން އެ ސަރަހައްދުގައި ބިދޭސީން ކުރާ ވިޔަފާރިތައް ހުއްޓުވަން އުޅުނު ނަމަވެސް އެކަން ކާމިޔާބު ކުރެވިފައެއް ނުވެ އެވެ.
ނަމަވެސް މި ސަރުކާރުން ވެރިކަަމަށް އައުމަށް ފަހު ގަވައިދާ ހިލާފަށް ވިޔަފާރިކުރާ ބިދޭސީން ހޯދުމަށް ވަރަށް ފުޅާކޮށް އޮޕަރޭޝަންތައް ދަނީ ކުރިއަށް ގެންދަމުންނެވެ.
އަދި ގިނަ އަދަަދެއްގެ ގަވައިދާ ހިލާފަށް އުޅޭ ބިދޭސީން އަތުލައިގެންފައިވާ އިރު މި ސަރުކާރުގެ އެއް އަހަރުގެ ތެރޭގައި އެކަނި ވެސް ވަނީ 5000 އަށް ވުރެ ގިނަ ބިދޭސީން ފުރުވާލައިފަ އެވެ.
