އެޗްއައިއެޗްއިން ޓްރާންސްފާ ކުރި މީހުން އިތުރު 14 ދުވަހަށް ކަރަންޓީން ކުރަނީ
ހުޅުލޭ އައިލެންޑ ހޮޓެލްގައި ކަރަންޓީން ކުރުމަށް ފަހު ޓްރާންސްފާ ކުރި ދިވެހިން އިތުރު 14 ދުވަހު ކަރަންޓީނުގައި ތިބެން ޖެހޭ ގޮތަށް ނިންމާފައިފިއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ކޮވިޑް-19ގެ ތަރުޖަމާނު މަބްރޫކް އަޒީޒް ވިދާޅުވީ އެ މީހުން އިތުރު 14 ދުވަހަށް ކަރަންޓީން ކުރަން ނިންމި ނިންމުމަކީ އުނދަގޫ ނިންމުމެއް ކަމަށާއި އެ މީހުންނަށް ދަތިތައް ދިމާވާނެ ކަން ވެސް އެނގޭކަމަށެވެ.
"އެކަމަކު މިކަމާ ގުޅިގެން ސަރުކާރުގެ ވިސްނުން ހުރީ ސަލާމަތް އިސްކުރަން. އަޅުގަނޑުމެންނަށް ނެގެން ނެތް ރިސްކެއް އެއީ އެ ކުދިން އަނބުރާ ގެނައުމަކީ." މަބްރޫކް ވިދާޅުވިއެވެ.
މި ބައްދަލުވުމުގައި އައިޖީއެމްއެޗްގެ ޑޮކްޓަރު މޫސާ މުރާދު ވިދާޅުވީ އެ ހާލަތުގައި ތިއްބެވި ބޭފުޅުންނަށް ދަތި ނިންމުމެއްކަން އެނގޭ ކަމަށާއި ނަމަވެސް މިއީ މުޅި މުޖުތަމައުގެ ސަލާމަތަށް ނިންމި ނިންްމުމެއް ކަމަށެވެ. އެހެންކަމުން ކަރަންޓީން ކުރަން ނިންމީ އެކަން ހިނގައިދިޔަ ދުވަހުން ފެށިގެން 14 ދުވަސް ކަމަށެވެ.
އެޗްއައިއެޗް ހުސްކުރަން ވެގެން އެތާނގައި އޭރު އައިސޮލޭޝަންގައި ތިބި މީހުން އެހެން ތަނަކަށް ގެންދިޔަ ފަހުން، އެތާނގައި ހުރި ދިވެއްސަކު ޕޮޒިޓިވް ވުމާ ގުޅިގެން ކަމާ ބެހޭ ފަރާތްތަކުން މިހާރު ގަބޫލުކުރަނީ އޭނާ އާ ކޮންޓެކްޓްވި އެންމެން އޭނާ ޕޮޒިޓިވް ވުމާ ހިސާބުން ފެށިގެން 14 ދުވަސް އަދި ކަރަންޓީނުގައި ތިބެން ޖެހޭނެ ކަމަށެވެ.
އިތުރު ތަފްސީލު އަންނަނީ...
